Meeting pawimawhah MP pahnih an tel
Sorkar laipuia Parliamentary Affairs minister Kiren Rijiju kaihhruaiin July 21, Pathianni khan Parliament Monsoon Session neih tura inbuatsaihna atan All Parliamentary Leader Meeting neih a ni a; Mizoram Lok Sabha MP Richard Vanlalhmangaiha leh Rajya Sabha MP K Vanlalvena te an tel.
Sorkar thuchhuah tarlan danin, All Parliamentary Leader Meeting-ah hian Lok Sabha MP Richard Vanlalhmangaiha chuan hmarchhak state-te tana Non-Lapsable Central Pool of Resources (NLCPR) 10% dah (reserved) a nih ṭhin angin, corporate social responsibilty (CSR) fund pawh hmarchhak state-te tan 10% dah a nih ve theih nan budget session-ah sawiho tura pharh ni se a duh thu a sawi.
Rajya Sabha MP K Vanlalvena chuan, May 28, 2024-a Remal Cyclone-in Mizoram a nuai avanga Aizawl khawpuia mi 30 thihna leh chhungkaw 40 chuang in chán an awm thu te, quarry chim vanga mi 14 thihna te, July 2, 2024-a leimin vanga mi pathum thihna te, fûr ruahsur nasa vanga Mizoram hmun hrang hranga leiminin kawngpui a tihchhiat te, tui lianin leilet leh thlai a tih chhiat nasat thute a sawi a; Disaster Management & Rehabilitation (DMR) department tan sum pek belh a ṭul thu a sawi bawk.
All Parliamentary Leader Meeting hi Union Defence minister Rajnat Singh leh Rajya Sabha leader JP Nanda ten an telpui a ni.