Minister-in Aizawla PE hnathawhte a enfiah
Power & Electricity minister F Rodingliana chuan tun hnai khan Aizawl khawpuia Power & Electricity department hmun pawimawh ṭhenkhat leh hnathawh mekte a enfiah a; chak zawka hna thawh a nih theih dan tur engineer-te leh contractor-te a sawipui.
F Rodingliana chuan, Power & Electricity department hmalakna leh ruahmanna kal mekte chu a pawimawh thu a sawi a, "Khaihlak loa power supply kan neih theihna tur a nih bakah, thlasik lo thleng tur atana inpuahchahna a ni. Hunpui laia power hman zat a sàn avanga harsatna awm ṭhinte pumpelh a nih theih nan ruahmannate hi chak taka bawhzui a ṭul," a ti.
Minister hian Chitea 33 KV Sub-Station siam mek chu September 2024 ral hmaa zawh hman tum turin thawktute a chah. Zuangtuia MRT Division-ah store thawm ṭhat dan tur leh transformer chhia siamṭhatna tur workshed dinna tur hmunhma a enfiah a, electric bante chu a len zawng leh rih zawng endik ṭhin turin thawktute a chah. Zuangtui Sub-Station aṭanga Bukpui (Serchhip) kaltlanga chhim lama kawlphetha pekna line tihchangtlunna atana CT transformer lian dah dan tur a enfiah bawk.
POWER & ELECTRICITY DEPATMENT HMALAKNA
Chitea 33 KV Sub-Station:
▶ Sub-station siam mek hi NESIDS aṭanga hmuh niin, transformer lian MVA 10 pahnih dah tura ruahman a ni.
▶ Siam zawh a nih hunah tuna Zuangtui (lower) Sub-Station, Indoor Sub-Station leh Mualpui Sub-Station-in a châwm veng tam takte a chhâwk zângkhai thei dawn.
Zuangtui MRT Division:
▶ Transformer chhia siamṭhatna tur workshed tihpuitlin a nih hunah Mizoram hmun hrang hranga transformer chhiate dah khawm a ni ang.
▶ Transformer chhia thawm ṭhat (repair) theihte phaia thawn ngai loa siam theihna tura ruahman a ni a, nasa takin sum senso a titlem dawn.
CT Transformer lian:
▶ Zuangtui Sub-Station aṭanga Bukpui (Serchhip) kaltlanga chhim lama kawlphetha pekna line tihchangtlunna tur a ni.
▶ Chhim lama kawlphetha pekna ber Melriat Sub-Station line a chhiat châng pawha Zuangtui-Bukpui (Serchhip) kaltlanga chhim lam (Khawiva Sub Station)-a kawlphetha pek ṭhin chu load shedding ngai loa duh thála kawlphetha pek theihna tura ruahman
a ni.