Chetsualna vangin mi pahnih thi

July 21, Pathianni tlai leh zanah khan luia chet-sual­na avang leh vawk kaw-chhung chhumna bela chet-sualnaah mi pahnih an thi.

Lalrinawma (23) s/o Zomuana (L), Hlimen chu Pathianni tlai dar 3:30 vel khan Setlak luiah chesualin, tuiah a tla hlum. Mi tlawmngaite'n zawng nghal mah se an hmu mai lo a; nimin khawvar hnuah zawn chhunzawm niin, chawhma dar 10:25 khan a tlakna aṭanga hla lo têah a ruang hmuh a ni.

Lalrinawma hi Hlimena an chhungte ina awm ṭhin a ni a, tun hnaiah Central Jail Venga a farnute inah a awm. A ruang hi Hlimenah lak a ni a, nimin tlai khan vui a ni.

Isak Zodintluanga (4) s/o Anthony Lallawmkima, Serchhip Chanmari Veng chu July 20, Inrinni khan a pate'n vawk kawchhung an chhum­na bêlah a tlu lut palh a, a hliam tuàr loin July 21, Pathianni zan dar 6:40 khan a thi.

Thu dawn danin, Isak Zodintluanga hi Serchhip District Hospital panpui a nih hnuah Zoram Medical College (ZMC) panpui leh a ni a, ZMC-ah hian a hliam tuàr loin a thi. Nimin chhun dar 12 khan vui a ni.