Sorkar doctor NPA la list la dawng lo
Mizoram sorkar hnuaia thawk doctor zinga non practising allowance (NPA) la lo tura inti a, NPA la site hming list Health Principal Director-in a la dawng lo.
Health & Family Welfare department-a Under Secretary chuan July 10, 2024 khan Health Principal Director hnenah Mizoram sorkara thawk nghet doctor zinga private practise (mimal damdawi-ina thawk leh clinic hawng) ti chunga NPA late list thehlut turin a ngen a ni.
HFW Under Secretary-in lehkha a thawn subject-ah 'Mizoram sorkar hnuaia doctor-te NPA pek chhunzawm tawh loh chungchang' tih ziah a ni a; "Chief Minister Office aṭanga thu kan hmuh angin, doctor zinga private practise ti lo tura inziak, NPA dawng, private practise la ti tho site list rawn thawn turin ka ngen a che," a ti a, a hmanhmawhthlak thu a tarlang.
Hetih lai hian, nimin thleng khan Health Principal Director chuan NPA late list a la dawng lo. NPA late list chu Directorate of Medical Education leh Directorate of Health Services aṭanga dawng tur an nih thu leh chumi hnua Health Secretary hnena thehlut ve leh tur an nih thu Health Principal Director office-a thawkte chuan an sawi.
Thu dawn danin, Central Health Service Rules, 2014-a Rule 13-ah chuan sorkara thawk doctor-te tan private practice phal a nih loh thu a chuang. Mizoram sorkarin February 17, 2010-a The Mizoram Gazette a tihchhuahah pawh Mizoram sorkara thawk doctor (Mizoram Health Service)-te tan private practice phal a ni lo a; private practice ti lote'n NPA an la thei tih tarlan a ni bawk.
Mizorama sorkar doctor-te NPA hi an basic pay aṭanga 20% vel a nia thu dawn a ni.