NPA sawhkhâwk a na viau mai thei, mahse, kan titawp dawn - Chief Minister

Chief minister Lalduhoma chuan, Mizoram sorkara thawk doctor, private practice ti telte'n Non-Practising Allowance (NPA) an lak tihtawp an tum chu an kaltlangpui ngei dawn thu a sawi.

CM Lalduhoma hian nimin khan Aijal Club leh Zoram Research Foundation (ZRF)-in Aijal Club-a 'Symposium on State Finance: Issues and Challenges' an buatsaih a hmanpuinaah thu sawiin, sorkar sum renchemna turin kawng hrang hranga hma an lak thu a sawi a, "NPA hi titawp ngam awmchhun sorkar kan ni turah ka inngai. A sawhkhâwk chu a na viau mai thei, mahse, kan titawp dawn," a ti.

Sorkar hnaah officer lama indaih lo viau mah se, an hnawhkhat ṭha a, a hnuai lamah an indaih loh nasat thu sawiin Lalduhoma chuan, "Hei hian kan administration a tilang khawp mai a, senior officer-te'n kan theihna leh dinhmun hmangin kan dinhmun chu kan humhim ṭha viau a, kan naute erawh chu kan ngaisak lo tih a chiang. Hei hi sorkarin a tuar mek," a ti a; sorkar hna lakah a chung lam chu an tih vak dawn loh thu leh a hnuai lam chu a theih ang angin sum nei lo chung pawhin tih a ngaih dawn thu a sawi.

Lalduhoma chuan, sum pûk tam an hlauh thu sawiin, "Sorkar hmasa khan ways and means atan vbc. 1,000 an dah a, keini chuan vbc. 3 kan dah a, ways and means-ah sum dah vak kan tum lo. Kan sorkar tirh khan overdraft kan chhawm a, ni rei lo tê chhungin kan tâl chhuak thei a, overdraft leh kan tum tawh lo. Ni 3-5 chhunga special drawing facility vawi hnih kan lak chhan chu a hlâwk zawk vang a ni," a ti.

Chief Minister chuan contract hna chungchangah, "A estimate hre sain hmuh loh hlau em emin an rawn dil a, kan pe a, engah nge min daih lo an tih leh si. Pawisa hemi zat hian ka zo ang an ti a, an inhuam a, an thawk a ni. Chuvang chuan cheng khat pawhin revise kan tum lo," a ti.

Contract hnaa sum revise ngai leh thawh hun pawhsei chungchang chu kohhran, tlawmngai pawl leh political party hrang hrang aiawhte awmna Project Monitoring Committee-in an endik hnua ennawn tura an rawtte chauh enawn a nih dawn thu leh, hun pawhsei sak pawh Committee rawtna ang chauha kalpui tur a nih thu CM chuan a sawi a ni.

Lalduhoma chuan, sorkar laipuiah Mizoram ngaihsak bik tura nawrna tur ṭha tak a awm niin a sawi a, "Rambuai a reh dawna Memorandum of Settlement-ah khan special category state anga enkawl zel a ni ang tih a chuang a, kha kha tu mah hian hnial khânah kan hmang ta lem lo niin ka hria. Tun ṭumah hian khami behchhan khan sorkar laipuiah a bik taka sum leh paia Mizoram puihna tur dil kan tum," a ti.

Symposium-ah hian panelist pali - adviser to CM (finance) TBC Lalvenchhunga, Finance minister hlui Lalsawta, journalist & lawyer J Malsawmzuala Vanchhawng leh PUC assistant professor Dr Daniel Lalawmpuia ten thupui an sawi a; kal khawmte'n zawhna leh rawtna an neihte an sawi bawk.

CHIEF MINISTER SAWI DANGTE

- Surcharge chawi tawh loin electric bill kan pe thei tawh.

- CM motor kawl RTI Act zawhna chhanaah CMO-a kan naute'n tun hmaa an lo chhan dan angin an lo chhang mai a, panga an ti a; car pakhat leh a spare pakhat bak ka nei lo.

- CM chuan doctor a hruai ngei ngei zel tur a nih laiin kei chuan ka hruai ngai lo. Tun hma zawngin doctor tel loin kan zin ṭhin a, Pathian zarah ka nat thut ka ring bik lem lo.

- CM-in magistrate an hruai ṭhin a, ka hruai ngai lo. District ramri zelah police-in an lo inhlan chhâwng ṭhin a, khangte kha kan titawp vek.
- CM convoy hi a tlâwm thei ang berin security-in a demand chinah kan kalpui.

- ADC pathumte hian an sorkar apiangin post sanction awm lo recruitment an ti zel. Tunah grand-in-aid an dawn aṭanga 93% vel salary-ah an hmang zo tawh a, hmasawnna hna tawhna tur 7% vel an la nei. Inthlang kual reng rengin an awm ṭhin a, vote oriented ringawta an budget an suasam hi dik kan ti lo.

- Governor-ah ADC chungchang file a awm mek a, endiktu tur team kan siam dawn. An mipuite an khawngaihthlak lutuk.

- K Deposit-a kum thum aia rei sum dah tawh kan thlithlai a, department hotute kan ko.

- SASCI sum hi capital asset siam nan hman ngei kan tum.

- Hand holding hnuaiah sorkar chu guarantor-ah kan ṭang dawn.

- CM adviser, OSD leh consultant sorkar sum sen belh mang loa kan ruat hi sorkarin a hlâwkpui.