Lirthei zuartute'n thiam lohna an nei lo - MCCI

Mizoram Chamber of Commerce & Industries (MCCI) hruaitute chuan nimin khan Aizawl Press Club-ah thuthar thehdarhtute an kâwm a; Mahindra & Mahindra Financial Services Ltd (Mahindra Finance) sum buai chungchangah Mizorama lirthei zuar-tute'n thiam lohna an nei lo niin an sawi.

MCCI president K Lalhmingthanga chuan, Mizorama lirthei zuartute'n Mahindra Finance, Aizawl Branch-in document lem tam tak siama vehicle loan lem an pek chungchang police hotute'n an sawi chu an hriat ve loh thu an sawi a, "Mizorama lirthei zuartute an inhnamhnawih ve lo," an ti.

K Lalhmingthanga chuan, Mahindra Finance-in trade advance (loan) Mizorama motor zuartute hnenah an pe nia sawiin, "Chu loan chuan motor an chah a, loan-a motor leitute'n interest nen Mahindra Finance-ah an rùl leh mai ṭhin. Trade advance hi Mizoram motor zuartute'n an hman sèn loh chu branch hotute duh danin Mahindra Finance-ah cheque/RTGS, etc.-in an kìr leh mai ṭhin," tiin a sawi.

Mizorama lirthei zuartute'n thil dik lo a awm tih an hre lo nia sawiin Lalhmingthanga chuan, "Dik takin loan-in motor an lei a, dik takin an rùl leh mai a, GST pawh rinawm takin Mizoram sokharah an chhunglut ṭhin. Sorkar pawhin Mizorama motor zuartute'n an sumdawnna ṭha taka an chhunzawm theih nan pui se kan duh," a ti.

MCCI hotute chuan, Mizoram financial literacy rate 1.38% chauh a nih avangin uar zawka financial literacy campaign neih a ṭul thu an sawi bawk.

MCCI HOTUTE TARLAN ṬHENKHAT

* Tunlai hi Mizoramah thlai thar tam vanglai ni mahse thlai man hi a sang hle.

* A phurh kualna man (transportation charge) san vang niin a lang.

* Mizorama hlawhtling taka state dang duh chi thil siamna industry din turin Mizorama awm ngei hmanrua kan hman a ngai.

* Commerce & Industry department-in sum tam tak senga mimal ram a leite chu Industry department kutah a awm ṭhin a, thawk khat lai aṭang khan GAD kutah hlan a ni.

* Ram allot theitu chu Industrial Area Management Committee kutah a awm a, tun hnai lawk khan industry ram engemawzat chu dan loa pek nia hriat a ni.

* GAD kutah ram hi awm mahse allotment authority chu chief secretary kaihhruai Industrial Area Management Committee kutah a awm.