AR sawnna tura MoU ziah tawh kar khat chhunga tihfel tum a ni

Union Home minister Amit Shah chuan nimin zing khan Aizawla Assam Rifles battalion hmunpui Zokhawsanga sawn chhuahna tura inremna thu­thlung ziah tawh chu chawlh­kar khat chhunga tihfel a tum thu chief minister Lalduhoma a hrilh.

Sorkar thuchhuah tarlan danin, Amit Shah hian nimin zing dar 9 khan CM Lalduhoma chu telephone hmangin a bia a; Assam Rifles sawn chhuahna tura Mizoram sorkar, sorkar laipui leh Assam Rifles-te inremna Memorandum of Understanding, hun engemaw chen Ministry of Home Affairs-in a kawl tawh chu chawlhkar khat chhunga tihfel a tum thu a rawn hrilh a ni.

CM Lalduhoma hian tun hnaia New Delhi-a a zin ṭumin Home minister Amit Shah hnenah hian ziakin Cyclone Remal vanga chhiatna tuartute leh ráltlânte chhawmdawlna tur dilna a thehlut a; nimin zinga telephone hmanga an inbiaknaah Amit Shah chuan chhawmdawlna leh raltlan ṭanpuinate an rawn pek dawn thu a rawn hrilh bawk.

June 20, 2024-a New Delhi-a Lalduhoma leh Amit Shah inkawm­naah Amit Shah chuan Aizawl aṭanga AR sawn chhuah chung­chang a sawi chhuak a, "Aizawl khawpui laili aṭanga Zokhaw­sanga AR sawn chhuah hi thu­tlukna siam tawh sa a ni a, kan sawn ngei dawn a, hmalak tawh chinte enin August thlaah rawn zin ka tum," tiin a sawi a ni.

Aizawl khawpui aṭanga Zokhawsanga AR battalion sawn chungchang hi July 4, 2024 khan CM Lalduhoma hoin sawiho a ni a; Home minister K Sapdanga, PWD minister Vanlalhlana, Power & Electricity minister F Rodingliana, PHE minister Prof. Lalnilawma, Assam Rifles inspector general (East) Maj. Gen. Suresh Kumar Bhambhu, 2 Assam Rifles commander Col. Mukesh Suhata leh a kaihhnawih sorkar department hotute an tel.

AR insawn chungchang sawihonaah hian Zokhawsanga AR hmun/ram paltlang ṭhin loneitute tana kawng thar sial vanga AR hmunhma ṭhenkhat sawn ngaite enfiah thuai rêl a ni a; loneitute tan kawng thar peih a nih hma chu loneitute'n AR ram an paltlang theih nan security pass siamsak an rel bawk.