MLP kenkawh kawngah theihtawp kan chhuah - END

Excise & Narcotics department (END) chuan thuchhuah siamin, Covid-19 léng karah zu khapna dan, The Mizoram (Liquor Prohibition), Act 2019 kenkawh kawngah theihtawp an chhuah thu an tarlang.

END chuan, inter-state leh international border-te sorkar inkaihhruaina anga khuahkhirh a nih avangin dan loa state páwn aṭanga zu leh ruihhlo lut a tlem phah hle thu an tarlang a, "Ram chhunga dan lo anga zu siam leh zuar en zui kawngah nasa lehzuala hmalak a ni," an ti.

END tarlan danin, kum 2020 chhungin kum dang aiin ruihhlo leh a kaihhnawih vanga dan bawhchhia an tlem. Kumin 2020-ah August thla thlengin ruihhlo vanga thi zat chu mi 45 (mipa 41 leh hmeichhia pali) an ni a; kum 2019-ah chuan ruihhlo vanga thi mi 55 (mipa 42 leh hmeichhia 13) an ni.

Vairengte checkgate-a thawkte zinga END mi, Covid-­19 vei pakhat awm chu sorkar­in theihtawpa a buaipui thu tarlangin END chuan, "Uluk taka a enkawl hnuah tunah chuan Covid-19 lakah an fihlim tawh. Sorkar, tlawmngai pawl leh Police department aṭangin Covid-19 damlo enkawl ngai enkawlna tura ṭanpuina leh thilpek kan dawn avangin kan lawm hle a ni," an ti.