Mimal thila zinte khungna senso sorkarin a tumsak lo - DMR Minister

Disaster Management & Rehabilitation (DMR) minister Lalchamliana chuan, mimal thil pawimawha zin veivâkte chu sorkarin quarantine centre-a an awm man leh ei man a tumsak theih tawh loh thu House a hrilh.

BJP member Dr BD Chakma-a'n quarantine centre-a awm­te ei man leh riah man sorkarin a tumsak tawh loh chhan a zawhna chhángin Lal­chamliana chuan, "Sorkar chuan quarantine centre-a awm sum leh pai lam harsatna nei te, state páwna damlo refer rawn hawte leh July 31, 2020 hma lama Covid-19 vanga an hna chán rawn hawte chu quarantine centre-a an ei leh in leh awm man a tumsak," a ti.

DMR Minister chuan, economics activity kalpui leh tawh a nih avang leh thlawhtheihna a thlawh leh tawh avangin mimal thil leh sumdawnna thila zin veivâk an tam phah thu a sawi a; mimal thil pawimawha zinte chu quarantine centre-a an awm man, ei man leh swab sample endikna man sorkarin mipui sum aṭangin a tumsak theih tawh loh thu House a hrilh.

DMR Minister sawi danin, Covid-19 dona atan State Disaster Respond Fund aṭangin cheng nuai 10.98 hman a ni tawh a, danin SDRF sum Co­vid-19 dona atana hman a phal chin aṭangin hman loh cheng nuai 229.55 a la awm a ni.