Kuhva tawlh rûk CBI chhuitir

Myanmar lam aṭanga Mizorama dan loa kuhva rah lut, dan loa tawlh rûk chungchangah Gauhati High Court Aizawl Bench-a public interest litigation (PIL) a lut a, PIL thehluttute chuan Central Bureau of Investigation (CBI) chhuitir an ngèna sawi a ni. Mizoram sorkar pawhin CBI chhuitir remtih lohna an neih loh thu tun hnaiah High Court-ah a thlena sawi a ni bawk.

Mizoramah ram dang aṭanga dan loa kuhva rah tawlh rûk kan buaipui rei ta hle mai a; tihtawp a nih theih nan sorkar mai bakah, tlawmngai pawlte pawhin hma an lo la tawh ṭhin a, tun thlengin an la bawhzui mek zel. Chuti chung chuan kuhva rah tawlh rûk a la tawp lo a, a la awm reng niin a lang.

Ram dang aṭanga lak luh kuhva rah tawlh rûk chungchang Mizoram sorkarin CBI chhuitir remtih lohna a neih loh thu High Court a hrilh hi a lawmawm a, Mizoram mipui náwlpui duh dan pawh a ni ang. CBI-in an chhui ngei beiseiin mipuiin thuneitute thutlukna an thlir rengin a rinawm.

Kuhva tawlh ruk hi Mizo mipuiin tawp se an duh a, sorkar pawhin a duh ngei niin a lang. Kuhva rah tawlhruk titawp tur leh dan loa tawlh rutute hrem an nih theih nan a ṭul a nih phawt chuan sorkar hian CBI chhuitir hreh lo se, a ṭul a nih phei chuan ngen zawk hial se a ṭhain a rinawm. Chu chu mipui tam berte duh dan a ni pawhin a rinawm a ni.

Ram dang kuhva rah tawlh rûk titawp tura hmalaknaah hian la tih fuh tâwk loh a la awm a ni mai thei. Thuneitute'n ngaihtuahna zau leh thuk zawk sêngin bawhzui se, na zawkin kuhva tawlh rûk titawp turin sorkarin hma la zel rawh se.

Kuhva tawlh rûkah sorkara thil ti thei tak tak inhnamhnawih an awm a nih phei chuan sorkar tan huaisen a ngai hle ang; huaisen turin mipuiin sorkar an beisei a ni.