MBSE-in compartmental result a tichhuak

Mizoram Board of School Education chuan nimin khan HSLC leh HSSLC Examination 2024-a compartmental chance nei leh pass zinga subject pakhata exam nawn leh duhte tana improvement exam a buatsaih result a tichhuak. Compartmental exam-ah HSLC zirlai 33.98% leh HSSLC zirlai 34.78% an hlawhtling.

HSLC Compartmental Examination 2024-ah hian zirlai exam mi 103 zinga 35 (33.98%) an pass a, zirlai 68 (66.02%) an hlawhchham. HSLC Examination 2024-a pass, an mark hmuh tlemna subject pakhata exam nawn leh zirlai 13 zinga pali (57.14%) chuan exam pangngaia an mark hmuh an khûm a, zirlai pathumin an mark hmuh tawh sa an pha lo.

HSSLC Arts-ah compartmental exam beitu zilai 34 zinga 10 (29.41%) leh Science-ah zirlai exam 11 zinga paruk (54.55%) an hlawhtling a; Commerce-ah zirlai exam pakhat awmin, a hlawhchham thung.

Improvement exam-ah chuan HSSLC Arts-ah zirlai 15 zinga 10 (66.67%), Science-ah zirlai 46 zinga 22 (47.83%) leh Commerce-ah zirlai pali zinga pakhat (25%)-te'n mark hmuh tawh sa an khûm.

MBSE hotute hnen aṭanga Vanglaini thu dawn danin, improvement exam-ah hian exam pangngaia pass tawh, mark hmuh ṭhat zawk beiseia an duhna subject pakhata exam lehte an nih avangin fail theih a ni lo. Exam pangngaia an mark hmuh tawh sa khûmte chuan improvement exam-a an mark hmuh chu an final mark-ah an ring dawn a; exam pangngaia mark hmuh khûm lote chuan exam pangngaia an mark hmuh an ring tlang dawn a ni.

Compartmental exam-a hlawhtlingte nen HSLC 2024-ah zirlai 18,561 zinga 13,653 an pass a, a hmaa pass percentage 73.37 chu 73.56-ah a chho. HSSLC 2024-ah zirlai 11,824 zinga 9,243 an hlawhtling ta a, a hmaa pass percentage 78.04 chu 78.17-ah a chho a ni.