Gas hmanga kawlphetha siam turin Sorkarin theihtawp chhuah a tum - Zoramthanga

Chief minister Zoramthanga chuan, gas hmanga kawlphetha siam chhuak turin theihtawp a chhuah dawn thu a sawi a, "Chutih rualin, hydel project pawh kan mausâm chuang lo," a ti.

ZPM member Vanlalhlana'n Power & Electricity minister R Lalzirliana a zawhna kal zelah Chief Minister chuan, power lama an hmalak dan tur a sawi. Vanlalhlana chuan, MNF-in SEDP-ah power-a intodelh bakah, thawn chhuah tham siam chhuah an tum thu sawiin, "Power-a intodelh tura hmalakna a ho tham hle," a ti.

CM Zoramthanga chuan, power chu phai aṭanga lei mai bakah, siam chhuah ve a ngaih thu sawiin, "Hydel project hi a hautak a, forest clearance a harsat bakah compensation a ngai tam. Mahniin khuap dawn ila, vbc. 1,000 tél a ngai a, company dang khuahtir chuan power siam chhuah tam ber an chang," a ti a, state dang pawhin lui luang ṭha pangngai chu an khuah duh tawh lo niin a sawi.

Gas leh ni chakna hmanga kawlphetha siam uar a nih thu sawiin CM Zorama chuan, "ONGC nen pawh kan sawiho. Meidumah hmuh a ni a, mahse, duh angin a tam lo. Hortoki bulah verhna tur an hual a, lirthei a luh loh avangin kawng laih chawp a ni. Covid-19 a reh veleh verh ṭan tum. Theihtawpin, gas hmanga power siam chhuak turin nasa taka tih kan tum," a ti.

P&E minister R Lalzirliana chuan, kawlphethaa intodelh tura sorkar hmalakna sawiin, "Hydro electric project eng emaw zat siam tawh a ni a, tunah siam mek leh siam tura hmachhawp eng emaw zat a awm," a ti a; solar power project pawh eng emaw zat din tura hmalak a nih thu a sawi.