Covid-19 donaah MNF kaihhruai sorkar a hlawhchham chiang hle - MPCC

Mizoram Pradesh Congress Committee (MPCC) chuan, Mizoram sorkar chu Covid-19 hripui lêng donaah hlawhchham chiang hleah an puh a; MNF kaihhruai sorkar chu Mizorama sorkar ding tawh zingah pawisak nei lo ber leh, dan leh mipui zahna nei lo ber an nih thu an tarlang.

MPCC Media department hruaitute chuan nimin khan Aizawl Press Club-ah thuthar thehdarhtute an kâwm a; an chairman Dr Lallianchhunga chuan, Covid-19 donaa a hmatáwnga ṭangte himna tur leh hri an vei palha enkawlna tur sorkarin a ruahman fel lo hle tih sawiin, "Frontline worker ṭhenkhat chuan an inenkawlna tur an intum a ngai hial a ni," a ti.

Lallianchhunga chuan, Mizorama local/village task force-te puitu, volunteer-te himna tur leh hripui an kai palha enkawlna tur sorkarin a la ruahman lo tih sawiin, "Hei hian Covid-19 dotute himna leh hriselna MNF sorkarin a ngaihthahzia a entir chiang hle," a ti a; containment zone ṭhenkhatah task force duty peih an awm tawh lo a, police duty an awm loh bawk avangin containment zone ṭhen­khat chu a zalên hle niin a sawi.

Dr Lallianchhunga chuan, CCC, ITI aṭangin Covid-19 la vei reng chungin mi eng emaw zat chu CCC-a ni 14 an awm tlin tawh vang ringawtin chhuahtir an ni tih sawiin, "Hnam dang eng emaw zat phei chu positive chunga chhuahtir an lo ni tawh. Mipui himna leh hriselna hi MNF sorkar hian a ngaihtuah tak tak lo tih a chiang hle, Covid-19 hi mipuiah darh se pawi an ti miah lo tihna a ni," a ti.

MPCC Media Chairman chuan, "MNF sorkar hi Mizorama sorkar awm tawha pawisak nei lo ber, dan leh mipui zahna nei lo ber a ni," tiin, inthlan chung­chang thlengin an chan ṭhatna tur a nih chuan pawisak an nei lo tih a sawi. Sorkar chakna ṭan chhanin hmun tam takah VC/LC atana party dang aṭanga thlante MNF-a inlet tura an thlèm bakah an vau nasa nia sawiin, "Hetiang em ema mipui duh thlanna zahna nei lo leh pawisak nei lo hi Mizoramah sorkar an la awm ngai lo," a ti.

    Covid-19 in thla 6 chhung min chên chilh chungin sorkarin RT-PCR test theihna BSL-2 pahnih bak a siam puitling lo. CM Relief Fund aṭanga lei TrueNat khawl hman theih a la ni lo. Thermo Fisher company, USA siam RT-PCR cheng nuai 22 man, June thlaa chah tawh anga sawi tun thlengin Mizoram a lo thlen âwm hriat a la ni lo.

    July 2, 2020-ah CMRF aṭangin district hospital-a hman tur TrueNat-PCR khawl lei nan Rs. 2,01,15,000 sanction a ni a, tun thlengin hman ṭangkai a la ni lo.

    CLP leader Zodintluanga Ralte-in Lunglei tana RT-PCR khawl a lei chu sorkarin hmang duh loin, tun thlengin hman lohin a la awm.

    Covid-19 lên vanglai ṭan chhana chak tum an nih avangin VC leh LC inthlan a buarchuar phah. Vote thlak tur mipui mamawh tâwk polling booth an siam lo.

    September 4-a VC leh LC inthlanna turah a hma aia social distancing kenkawh ṭhat tum siin, voter 700 vel tan polling booth pakhat chauh siam an la tum tho.

    Inthlan chungchangah mipui inzirtirna mumal a awm loh avangin vote thi a tam em em.