CM leh AR hotu lu an inkâwm
Assam Rifles director general Lt.Gen. Sukhdeep Sangwan leh amah ṭawiawmtute chuan nimin zing khan chief minister Zoramthanga chu CM banglaah an hmu a, tun hnaia Mizoram sorkar leh Assam Rifles inkara inhriattthiam lohna thleng chungchang leh AR awmna hmun chungchang an sawipui.
Sorkar thuchhuah tarlan danin, CM Zoramthanga chuan, Assam Rifles-te chu an awmna tura buatsaih Zokhawsangah a rang thei ang bera insuan turin Lt.Gen. Sukhdeep Sangwan a ngen. Hri léng vangin Zokhawsanga hmalakna ṭhenkhat thawh zawh theih loh awm mah se, an insuan chhuah har avangin Smart City project hmalakna ṭhenkhat a ṭhuanawp phah thu leh, a hma thei ang berin a tahtawla insawn tura a duh thu a sawi.
Covid-19 laka mipui him tlân zawk nan paramilitary force-te vawi khata tam tham tak an insawn ṭhin chu a ṭul tàwpah lo chuan tih rih loh ni se a duh thu sawiin, chumi chungchang chu sorkar laipuiah pawh a lo thlen tawh thu Zoramthanga chuan a sawi a, "Mizoram hi state rálmuang tak a ni a, chuvangin, paramilitary force, Mizoram chhunga chengte nen inlungrual taka awmho zel theih kan duh a ni," a ti.
Chief Minister chuan, Mizoram chu ram dang pahnih nena inri a nih avangin, dan loa ramri kâna lut leh chhuak an awm ṭhin bakah, ruihhlo leh thil dang tawlh ru an awm ṭhin chu a ngaimawh thu a sawi a; ramri vengtu Assam Rifles-te'n ngawrh leh zualin Mizoram ramri an vên a ṭul thu leh, ramri hnaih leh zualah camp an neih ṭul a tih thu a sawi niin sorkar thuchhuah chuan a tarlang.
Lt.Gen. Sukhdeep Sangwan hian nimin vek khan chief secretary Lalnunmawia Chuango a pisa-ah a kawm. Sorkar thuchhuah tarlan danin, CS hian AR Director General hi tunhnai a AR-te chet danin state sorkar leh mipui rilru a tih nat thu leh thupha chawi tura a ngaih thu a lo hrilh.