Mauah sorkarin risk kan lo la a nge - Chief Minister

Nimina Assembly session-ah Horticulture changtu chief minister Zoramthanga chuan, mau chungchangah sorkarin risk an lâk tur thu House a hrilh.

ZPM member Dr Vanlalthlana chuan, National Bamboo Mission (NBM) revised guideline-ah sum dawnna atana mau chìn turah Brandisii leh Latiflorus a lan telh loh thu sawiin, "Indigenous species-te erawh chìn theih a nih thu tarlan a ni. Brandisii leh Latiflorus hi indigenous species a nih leh nih loh ka zawt a, Horticulture department-in min hrilh thei lo. Kan Chief Minister hian min hrilh thei em?" a ti.

ZPM Legislature Party leader Lalduhoma pawhin, NBM list-a mi chìn mai âwm tih thu sawiin, "Brandisii leh Latiflorus-te hi ṭha se chuan NBM hian list-ah an telh em em ang," a ti a; Brandisii chu Karnataka-ah kum 100 vel chìn a nih tawh avangin ṭha se chuan NBM tan hriat loh chi a nih loh thu a sawi.

CM Zoramthanga chuan, mau chìn tur order siamtute'n mau chi an hriat vek bik loh thu sawiin, "Secretary level-ah phei chuan an hre lo em em ni. NBM-te nen pawh vawi tam kan sawiho. An hriat loh rua/mau ṭha a awm dawn tih hriain, indigenous species tih pawh hi an telh," a ti.

Zoramthanga chuan, Brandisii chu British-te'n Myanmar aṭanga lain South India lamah an chìn thu sawiin, "Latiflorus hi Nagaland-ah an ching a, a ṭha em em. Latiflorus hi kan huanah kum 20 vel a awm tawh a, a ṭha em em a, Brandisii pawh kum 10 kal ta khan kan huanah kan chíng tawh. Kei chuan indigenous angah ka ngai tawh," a ti a; Delhi-in indigenous a ni lo tia a paihsak an hlauh loh thu a sawi.

Mau chìn chungchang chu a sorkar kengtu kutah dah mai ṭha a tih thu sawiin Chief Minister chuan, "A ṭha tih kan hmu a, a chi siam thiamin min supply a ni. A ṭha ngeia kan hriat chu list-ah a tel chiah lo tih ni mah se, sorkarin risk kan lo la a nge. Lo engto suh se," a ti.

Growmore Biotech Ltd., Tamil Nadu-in Mizoram mau second hardening nur­sery a tihna ram neitu hming Lalduhoma'n a zawhna ziaka chhangin Zoramthanga chuan, Horticulture department-in tender a kohin terms and conditions-ah neitu hming leh pass thehlut tura a dil loh avangin, Growmore Biotech Ltd.-in Mizoram mau second hardening-na hmun ram neitu hming a hriat loh thu a tarlang.