Mizo siam mask zuar chhuak
COVID-19 dona atan Committee on Promotion of Locally Manufactured Protective Gears-in hmai tuamna (mask) siam tura a tihte'n WHO leh MoHFW-in mask ṭhui dan tur a tih anga Mizoram chhunga ṭhuitute'n an siam chhuahte chu sorkar remtihnain Millennium Centre kawtah leh New Capital Complex-ah zawrh chhuah ṭhin a ni.
Committee on Promotion of Locally Manufactured Protective Gears chuan Covid-19 laka invenna atan Mizoram chhunga ṭhui mask tam zawk hman a rêl a, March 2020 aṭangin hmalak ṭan niin, tun thlengin mask 1,42,525 ṭhui a ni tawh. Mask chu WHO leh MoHFW-in ṭhui dan tur an tih ang zâwm chungin, mi náwlpuiin an lei ngam turin a tláwm thei ang bera hralh a ni.
Mask ṭhuitute chuan a thawhkhatnaah non-woven mask ṭhuiin, an ṭhuina senso chu pakhatah Rs. 13 a nih laiin, Rs. 10-in an hralh a, sûk theih leh hman nawn theih a ni. A thawh hnihnaah woven fabric 100% cotton-in, suk theih leh hman nawn theih an siam leh a, Rs. 15 man a ni.