Covid-19: Mizoram dinhmun Niminah mi 49 chhuahtir an ni

September 1, Thawhlehni khan Mizoramah Covid-19 hripui vei hmuh chhuah thar mi pariat an awm a, an zingah Mizoram chhunga kái chhâwng (positive contact) pakhat a tel. Nimin khan Vairengte-ah mi pathum hmuh chhuah belh a ni bawk. Hripui vei hmuh tawh zawng zawng chu mi 1,023 an ni. Nimin khan mi 49 chhuahtir an ni a, Thawhlehnia chhuahtir zinga mi pasarih chu nimin khan CCC, ITI, Aizawlah dah luh leh an ni thung.

Mizorama hripui vei hmuh tawh mi 1,023 zinga 652 (63.73%) chu chhuahtir an ni tawh a, mi 371 (36.27%) an la chhuak lo. La chhuak lo zingah hripui vei tawh lo (negative tawh) mi eng emaw zat an awm a, chu'ng zingah chuan Mizorama Covid-19 vei zinga naupang ber, nausen thla thum mi, Chaltlang Lily Venga mi pawh a tel nia thu dawn a ni.

Thawhlehnia hripui vei hmuh chhuah zinga pasarih chu ZMC Covid-19 laboratory-a hmuh chhuah an ni a; mi pasarih zinga paruk chu sipai niin, Assam Rifles panga leh BSF pakhat an ni. An vaiin state páwn aṭanga tun hnaia lo lut, quarantine centre-a awm lai an nih thu sorkar thuchhuahin a tarlang. Pakhat dang chu College Veng, Aizawla hmeichhia kum 40 mi a ni a, a hmain a pasalin hripui a lo kai tawh avangin a pasal aṭanga kai nia rin a ni.

September 1-a hripui vei hmuh thar dang pakhat erawh chu nimina chhuak Vanglainia tarlan tawh, Vairengte chekckgate-a RAT hmanga hmuh chhuah hnam dang a ni.

Nimin khan Vairengte checkgate-ah RAT hmangin Covid-19 positive mi pathum hmuh chhuah niin, hnam dang vek an ni a; hei hi statistics-ah belh tel a ni. Vairengte-ah hian nimin tlai dar 5 thleng khan mi 11,440 (hnam dang 10,862 leh Mizo 578) endik tawhah hripui vei mi 106 hmuh chhuah a ni tawh a, hnam dang 104 leh Mizo pahnih an ni.

September 1, Thawhlehni khan ZMC-ah swab sample 608 endik a ni a, RAT hmangin 695 endik a ni. Lunglei Civil Hospital laboratory-a sample 31 endik zingah Covid-19 vei an awm lo.

Nimin khan hmun hrang hrang aṭangin Covid-19 vei dam tawh mi 49 chhuahtir an ni. Chhuahtirte chu - Thingdawl CCC aṭangin hnam dang truck driver/handyman mi 33, Tribal Art Centre CCC, Tanhril aṭangin mi pasarih (BSF paruk leh civil mi pakhat), Lengpui CCC aṭangin civil mi pathum, Darlawn CCC aṭangin civil mi pathum leh, Thenzawl CCC aṭangin civil mi pathum an ni.