Covid-19 positive 8 chhuahtir Sorkarin a ko kir leh vek

Health secretary H Lal­eng­mawia chuan nimin chawhma lam khan Aizawl West CMO hnenah lehkha thawnin positive chhuahtirte chu la let leh vek turin a hriattir a, "Positive la ni sia CCC aṭanga chhuah an ni hi sorkar dan ding lai kalh a nih avangin sorkar chuan a ngai thutak hle," tih a ziak a; hetihlai hian Health department aṭanga thu dawnnate chuan file kal sual palh leh thu dawn sual palh vangin an chhuahtir nia an hriat thu an sawi a, heng mi pariat tih loh positive ni chunga chhuahtir an la awm loh thu an sawi.

Vanglaini thu dawn danin, September 1 khan CCC, ITI aṭangin mi 12 - mipa panga leh hmeichhia pasarih chhuahtir an ni a, chu'ng zinga pali chu an swab sample endik nawnna (retest)-ah an negative tawh laiin, pariat erawh chu an la positive a ni. Positive chunga chhuahtirte hi Covid-19 positive tih hmuh chhuah an nih aṭanga tun thlenga harsatna (symptom) nei lo an ni a, an zingah hnam dang panga an tel.

Hemi chungchangah hian Health minister Dr R Lalthangliana chuan, "Nimin 1.9.2020 tlaia ITI CCC aṭanga Covid-19 positive chhuahtir chungchangah LTF leh mipuite chîâi lo turin ka ngen che u. Heng mite hi CCC-ah dah kîr leh vek an ni tawh a, tuna kan kalphung pangngai angin kal chhunzawm zel tur a ni," a ti.

Covid-19 vei, an negative hmaa chhuahtir chungchangah hian Covid-19 Medical Operation Team chairman Dr ZR Thiamsanga, MLA chuan, hripui veite chu Covid-19 vei tih finfiah an nih aṭanga ni 10 chhunga taksaa harsatna nei lo (symptom lang lo) an nih chuan, chhuahtir an nih pawhin mi dangah Covid-19 an kai darh thei tawh lo nia sawi a nih thu a sawi.

Negative tih finfiah hmasa loa chhuahtirte'n mi dangah Covid-19 an kài darh theih leh theih loh chungchang thuthar thehdarhtute'n an zawhna chhángin Dr ZR Thiamsanga chuan, "Kai darh thei tawh lo, an ti a ni. Viral load a sang tawh lo a, chance a awm tawh lo a ni," a ti.

Vanglaini palai zawhna chhangin Dr ZR Thiamsanga chuan, Covid-19 positive zingah rei tak tak positive an awm tih sawiin, "Ni 20, 30, 40-te an awm a, khang kha chuan infection an nei thei tawh lo. Khang dah reng ringawt mai chu a dik thei lo a ni. RT-PCR-ah hi chuan rei tak tak hi a positive thei a, amaherawhchu, kha'ng khan mi dang an kai thei tawh lo," a ti a; ICMR chhût danah chuan, ni 5-10 bak chu infection chance a awm thei lo tih a nih thu a sawi.

Dr ZR Thiamsanga chuan, Mizoram sorkarin Covid-19 discharge policy a duang thar tih sawiin, "Discharge policy thar hi mithiam hoin an ruahman a, WHO guidelines ai mahin a ṭha. Official-a tihchhuah a la ni lo a, approve a la ni lo. Health department-in a approve tur a ni a, Health Minister leh Secretary-ahte a kal a... approve a nih hmain 'discharge policy thar a awm alawm' an ti a, an lo chhuah ta mai a ni," a ti.

Ministry of Health & Family Welfare/ICMR-te'n Covid-19 vei dam tawhte chhuahtir dan tur, discharge policy (revised), kumin May thla chawhma lama an tihchhuahah chuan, Covid-19 veite chu chi thum - mild, moderate leh severe-ahte ṭhen a ni.

Mild leh moderate case-te chu an negative tawh tih finfiah nan swab endik nawn (retest) kher ngai lo a, ni 10 chhung symptom an neih loh a, ni thum chhung khawsik an neih loh chuan chhuahtir theih a ni. Na zual bikte (severe case) erawh chu retest tur a ni a, vawi khat chiah retest negative a ngai thung.

MoHFW/ICMR quidelines ang hian Mizoramah chuan kalpui a ni lo a, Covid-19 positive-te chu retest zel niin, negative tih finfiah an nih hnuah ṭhenkhatte chu vawi khat aia tam test negative hnuah an chhuahtir chauh ṭhin.

Health secretary H Lalengmawia chuan nimin chawhma lam khan Aizawl West CMO hnenah lehkha thawnin, Thawhlehni tlaia CCC, ITI aṭanga chhuahtirte chu la let leh vek turin a hriattir a, "Positive la ni sia CCC aṭanga chhuah an ni hi sorkar dan ding lai kalh a nih avangin sorkar chuan a ngai thutak hle..." a ti.

Health Secretary chuan September 1-a CCC aṭanga chhuahtir mi 12-te chu a rang thei ang bera la lêt (recall) turin Aizawl West CMO a hriattir a, nimin tlai dar 4 hmaa hmalakna report a hnena thehlut turin a hriattir bawk.

Hetih lai hian, Covid-19 vei leh dam tawhte chhuahtir chungchangah hian MoHFW/ICMR guidelines anga kal ve tawh rawtna a awm tawh a, minister aṭang pawhin kal dan tur duang tura a tih angin, Health departnent official-te pawhin an duang tawh a, file a kal mek nia thu dawn a ni.

Health Secretary tarlan danin, CCC, ITI, Aizawl aṭanga Thawhlehnia chhuahtir mi 12 zinga Covid-19 positive mi pariatte chu - hnam dang panga leh Mizo pathum an ni. Mizote chu Mamit district-a mi hmeichhia pahnih leh Chanmari West-a mipa pakhat an ni a; hnam dangte chu - Bihar/Durtlang, Zarkawt, Venghlui, Seling leh Chaltlang Lily Venga mite an ni.

Aizawl West CMO kaihhruaiin thawktute chuan mi pariatte chu lâk lêt tumin nimin khan hma an la nghal. Nimin tlai dar 6 vel thleng khan mi pasarih chu CCC-ah an dah lut tawh a, hnam dang pakhat erawh chu an be tlang thei lo.

Covid-19 la positive chunga chhuahtir zinga hnam dang pakhat awmna veng, Chaltlang Lily Veng LTF secretary Lalduhawma chuan, Covid-19 positive chunga chhuahtir an awm chungchangah nimin khan hmalak dan tur an rêl a, mahse, sorkar lamin lâk lêt tura a tih leh tak avangin hmalakna thar tur a awm lo a, positive chhungte erawh chu home quarantine-a dah an nih dawn thu Vanglaini a hrilh.

Positive chunga chhuahtir vêk hnam dang mipa naupang kum 13 mi awmna Zarkawt LTF chuan nimin khan hriattirna an tichhuak a, naupangte chhung­kua chu BSNL quarters, CM bangla hnuaia khawsa an nih thu tarlangin, an veng mipuite chiai lo turin an chah.

Zarkawt LTF tarlan danin, naupang hi test nawnnaah a la positive avangin a la chhuak thei lo a, a nu leh pate'n an ngaihtuah avangin an fapa chu awmpui tura CCC-a luh ve an duh a, hma lakpui turin LTF an ngen. LTF pawhin August 31 aṭangin hma an la a, mahse, an luh phalsak a ni lo. Naupang chu a pain sorkar phalnain a hruai chhuak a, mahse, sorkarin CCC-a dah luh leh turin nimin khan a ti a ni. Zarkawt LTF chuan, naupang chhungte chu khàrkhip zui an ni dawn tih an tarlang.