Ram pumah MHIP Day lawm dawn

Vawiin July 6 hi MHIP Day a ni a, MHIP din champha vawi 50-na, golden jubilee a nih bawk avangin MHIP Gen.Hqrs chuan Lammualah an lawm dawn. MHIP Gen. Hqrs president Ngurmawii Sailo chuan, MHIP Day thuchah tichhuakin, rahbi tleu a, ruihhlo ngai leh sual kawng zawh mekte chu beidawng lo turin a chah.

MHIP Day hi branch hrang hrangte'n an remchan angin an lawm dawn a, Aizawlah chuan MHIP golden jubilee a nih avangin Lammualah a huhoin an lawm dawn a, Chief Minister leh Social Welfare Minister ten an hmanpui ang.

MHIP President chuan, tu leh fa chhuanawm tak takte hnenah MHIP hminga lawmthu sawiin, "Rahbi tleu a, ruihhlo ngai leh sual kawng zawh mekte beidawng mai lo u la, nangmahni chhan turin veng tin leh khaw tinah MHIP kan awm e, kan hnenah lo tlu lut rawh u," a ti.

Hmun hrang hranga awm Mizote MHIP Day chibai bûkin Ngurmawii Sailo chuan, "Lalpa thlamuana leh a malsawmna in chungah thleng se la, Mizo hnam tana mi ṭangkai zawk nih i tum zel ang u," a ti a; MHIP kaltlanga rawngbawlna ngaihlu zual chunga mahni hmun ṭheuhah hlim taka MHIP Day lawm turin mipui a chah.

MHIP president Ngurmawii Sailo chuan, MHIP member-te chu MHIP golden jubilee chibai a bûk a; MHIP chu July 6, 1974-ah Mizoram Hmeichhe Insuihkhawm Pawl tia din a nih thu leh kum 1998-ah Mizo Hmeichhe Insuihkhawm Pawl tia thlak a nih thu a tarlang.

MHIP President chuan, MHIP-in a hnathawh ṭhat avangin pam pum huap chawimawina (national award) pahnih - Durga Bhai Deshmukh Award (Central Social Welfare Board, New Delhi, 2000) leh National Commission for Women Award (NCW, New Delhi, 2002) an dawng tih a tarlang a; hma an lakna hrang hrangah MHIP member-te ṭanrualna te, sorkar leh Mizo mipuiin an ṭawiawmnaahte an lawm thu a sawi bawk.