Kum 4 chhungin Synod-in kohhran dang Mi 740-te bill Rs 1,63,46,002 a peksak

Naktuk Pathianni hian Mizoram Presbyterian Kohhran chuan Health Sunday leh Hospital Sunday an hmang dawn. Synod Hospital chuan kum li kal ta chhungin Hospital Charity Fund aṭangin damdawi-ina awm mi 1,637-te awm man peksak a ni a, chu'ng zinga mi 740 chu kohhran/sakhaw dangte niin, an tan Rs 1,63,46,002 pek a nih thu an tarlang.

Kum 2008-a Synod Inkhawmpuiin a rêl angin Health Sunday leh Hospital Sunday hi kum 2010 aṭang khan July thlaa Pathianni hmasa berah hman ṭhin a ni a, naktuk July 7-ah pawh hman a ni dawn. Naktuk Pathianni chawhnuah Health Sunday hman a ni ang a, zanah Hospital Sunday hman a ni ang.

Hospital Sunday puala Synod Hospital-in a tarlan danin, sum kum 2020-21 aṭanga 2023-24 (kum li) chhung khan Synod Hospital Charity Fund aṭangin an damdawi-ina damlo awm, awm man pe thei lo mi 2,377 chu an awm man peksak a ni a, mi 2,377-te awm man chu Rs 5,33,03,294 a ni.

Kum 2020-21-ah mi 409 tan Rs 88,15,755, kum 2021-22-ah mi 597 tan Rs 1,19,79,116, kum 2022-23-ah mi 508 tan Rs 1,07,03,670 leh kum 2023-24-ah mi 863 tan Rs 2,18,04,753 peksak a ni. Hetih lai hian, June 30, 2024 thleng khan damlo mi 514-te damdawi-ina awm man bá Rs 2,00,42,944 a awm.

Kum li kal ta chhunga Hospital Charity Fund aṭanga damlo awm man peksak mi 2,377 zinga mi 1,637 chu Presbyterian Kohhran mi an ni a, mi 740 chu kohhran/sakaw dang an ni thung.

Kohhran/sakhaw dang Synod Hospital-a enkawl, damdawi-ina an awm man peksak mi 740-te bill chu Rs 1,63,46,002 a ni a, chu chu peksak zawng zawng aṭangin 30.66% a tling. Presbyterian Kohhran mi 1,637-te bill an peksak chu Rs 3,69,57,292 (69.33%) a ni.

Sum kum 2023-24 chhung bikah Hospital Charity Fund aṭangin damlo mi 863-te awm man Rs 2,18,04,753 pek sak a ni. Mi 863 zinga mi 615 chu Presbyterian Kohhran mite niin, an bil chu Rs 1,52,94,206 (70.14%) a ni a, mi 248 chu kohhran/sakhaw dang mite niin, an bill chu Rs 65,10,547 (29.85%) a ni.

Kum 2023-24 chhunga damlo, damdawi-ina awm man peksakte zingah hian Presbyterian Kohhran bakah, kohhran pawl dang chi 17 an awm a, sakhaw dang chi thum an awm bawk.