Mizoram sorkarin CBI hnenah General consent a pe nawn

Mizoram sorkarin Central Bureau of Investigation (CBI) hnenah Mizorama thubuai chhui phalna, general consent pe tawh mah se, CBI-in ruahmanna thar an siam angin June 27, 2024 khan CBI hnenah general consent a pe nawn leh a, official gazette-ah July 1, 2024 khan chhuah a ni.

Vigilance department tarlan danin, ZPM sorkarin inthlan laia mipui hnena a intiamna angin December 28, 2023 khan CBI hnenah Mizorama thubuai chhui phalna, general consent a pe. July 1, 2024 khan India ram pumah criminal law thar - Bharatiya Nyaya Sanhita, 2023 hman ṭan a ni a, chumi zûlzui chuan Department of Personnel & Training, Ministry of Personnel, Public Grievances & Pensions chuan CBI-in a chhui theih tur dan bawhchhiatna (offence) hrang hrangte chu a tharin a chhuah ta a ni.

Dan thar hnuaia CBl-in dan bawhchhiatna a chhui theih turte a thara an chhuah leh tâk avangin state sorkarin a hmaa CBI hnena general consent a lo pek tawh chu a thara tih leh a ngai tih Vigilance department chuan an tarlang.

Vigilance thuchhuah chuan, "CBI Director-in general consent pek thar leh a ngai tih state sorkar a rawn hriattir a, state sorkarin general consent a pek dan tur pawh ruahman sa a rawn dah tel bawk. CBI Director-in state sorkarina CBI hnena general consent a pek dan tura ruahmanna a rawn siam ang thlapin June 27, 2024 khan Mizoram sorkar chuan CBI hnenah general consent a pe thar leh ta a, official gazette-ah July 1, 2024 khan chhuah a ni," a ti.

Vigilance derpartment chuan, "A thara Mizoram sorkarin CBI hnena general consent a pek leh a ngaihna chhan chu dan thar hman a ngaih tâk vang a ni. Tun hmaa Mizoram sorkarin general consent a lo pek leh tuna a pek thar hi thil thuhmun reng a ni a, sorkar chu a dinna ngaiah a la ding reng a ni," tiin a tarlang bawk.