LADC by-election-ah MNF an chak
Lai Autonomous District Council (LADC)-a Lawngtlai Chandmary biala Member of District Council (MDC) by-election June 27, 2024-a neiha vote tlate chu nimin khan DC office complex-ah chhiar a ni a; MDC atan MNF candidate C Lalsawmzuala a tling. Thlan tlin tâk hi Congress party-in candidate hran siam loa an thláwp a ni.
Vote chhiar hi returning officer Cheemala Siva Gopal Reddy, Lawngtlai district election officer kaihhruaiin neih a ni a; thlan tlin C Lalsawmzuala'n vote 1,161 a hmu a, amah hnaih bertu ZPM candidate F Hrangtukhuma chu vote 285-in a hneh. C Lalsawmzuala hnenah hian RO chuan thlan tlin a nihna certificate a hlan nghal a ni.
Lawngtlai Chandmary MDC by-election-ah hian voter 2,798 (mipa 1,313 leh hmeichhia 1,485) zinga mi 2,061 (73.66%)-in vote an thlak a; ZPM candidate F Hrangtukhuma'n vote 876 hmuin, BJP candidate K Lalawmpuia'n vote 19 a hmu a; NOTA-ah vote 5 a tla bawk.