Kut hnathawktute kan tibeidawng dawn lo - Agriculture Minister

Agriculture minister PC Vanlalruata chuan, kut hnathawk-tute thlai thar lei tura an inbuatsaih dan a sawifiah a, "Kut hnathawktute hi kan tibeidawng dawn lo," a ti.

Agriculture Minister hian nimin khan a pisaah thuthar thehdarhtute a kâwm a; an intiam angin thlai chi li - sawhthing, aieng, hmunphiah leh hmarcha tharte chu sorkarin lei ngei a tum thu sawiin, "Ṭhenkhatin an leisak lo ang an ti a, kan leisak ngei dawn. Kut hnathawktute tihbeidawn kan tum lo," a ti a, kut hnathawktute tan theihtawp an chhuah mek thu a sawi.

Kut hnathawktute sorkar lakah an beidawn hman thu sawiin PC Vanlalruata chuan, "Beiseina thar neihtir tumin theihtawp kan chhuah a, beiseina thar an nei ṭan," a ti a; mangang lo turin kut hnathawktute a chah.

Agriculture Minister chuan, thlai thar lei chungchanga sorkar tum ber pakhat chu, thartute leh leitute awmze nei zawka an indawr tawn theih nana kawng sial a nih thu a sawi a, "Kum thum chhung hian mumal taka market linkage siam hman kan tum a, kum thum hnuah chuan sorkar a inrawlh vak ngai tawh lo tura sumdawngte leh thlai thartute an indawr theih tawh kan beisei," a ti.

PC Vanlalruata chuan, kum tharah sawhthing quintal nuai 10 chuang thar tura beisei a nih thu leh hralh dan tur ruahmanna chi thum an siam thu sawiin, "Kan hmalakna hmasa ber chu tender/auction system a ni a, tunah hian kan hriat theih chinah khaw 20 velin tender an kalpui mek," a ti a, kum tharah society kaltlanga tender system kalpui tum a nih thu a sawi.

Kum 2024-ah sawhthing thar a tam dawn avangin a hringa hralh sen a ni dawn loa a lan thu sawiin Minister chuan, "A sawngbawlna (processing plant) din tura chak taka hmalak mek a ni. He hmunah hian sorting, grading leh slice dry bakah, hmun ṭhenkhatah chuan ginger paste leh ginger ale-te pawh kalpui tura ruahman a ni," a ti.

Agriculture Minister sawi danin, sorkarin thlai rate a bituk aia sanga lei tur kut hnathawktute'n an hmuh chuan sorkar a inrawlh kher a ngai lo a; sorkar rate leh a aia sanga lei tur an awm loh chuan sorkarin a leisak thung ang.

Adviser to Chief Minister (Hand Holding) Dr KC Lalmalsawmzauva chuan, thlai thar chu society kaltlanga lei tur a nih thu sawiin, "Society hi sorkar kutke ber tur a nih avangin an mawhphurhna a sang hle dawn a, sum leh paiah hlâwkna leh ther hlo lam a keng tel hran lo. Society hi politics zawnga kalpui loh hram hram tur a ni," a ti a, thlai nei tawh phawt chu society member an nih theih thu a sawi.

Dr KC Lalmalsawmzauva sawi danin, society awm tawh sa rintlak a awm chuan fin mai a ṭha an ti a, rintlak a awm loh erawh chuan a thar din tum a ni. Society chungchang hre chiang duh tan Cooperation department-ah zawh chian theih a ni.