LMC leh LC-te'n thuthlung an ziak
Lunglei khawpui chhungah lirthei tlan dan enkawlna (traffic management) mumal zawk a awm theih nan nimin khan Lunglei Municipal Council (LMC) chairman Lalzuithanga kaihhruaiin LMC chief executive officer Donny Lalruatsanga leh Lungleia local council 23-te'n thawhhona thuthlung an ziak.
Thawhhona thuthlung hi LMC huam chhunga kawngpui a thâwl zawk theih nan leh mipui an him zawk theih nan te, kawngpui kama lirthei dah vanga lirthei chetsualna awm ṭhinte a ziaawm theih nante ziah a ni a; thuthlung hian March 31, 2025 thleng a huam dawn a ni.
THAWHHONA THUTHLUNG
■ Pukpui-Hrangchalkawn-Zobawk kawngpui bikah LMC-in private parking area a puan tawh bâk zawng chu commercial vehicle stand-te leh kawngpui kama garage neih loh vanga lirthei dah ṭhinte huamin parking fee khawn a ni ang.
■ LMC-in no parking area a puan tawhna hmuna lirthei dahte chu chawitir an ni ang. Hei hi LC-te'n an bawhzui dawn a, main road bakah district road leh veng chhung inkalpawhna kawngte a huam vek dawn.
■ Main road-a parking zone leh kawngpui dangah mimal lirthei dah duhte chu dahtir an ni ang a, LC-te'n parking fee an khawn ang.
■ LMC phalna tel loa zankhuaa riah ṭhin (overnight parking) lirthei lian chite chu chawitir an ni ang a, LC-te'n hma an la ang.
■ LC-te'n parking fee/pawisa chawitir aṭanga sum an lak luh chu LMC-ah thla tin 40% a chhûng ang.
■ LMC-a pawisa chhùn luh tur chu thla tin chawlhkar hmasa ber hun chhungin thehluh tur a ni.
■ Thawhhona thuthlung hi LMC-in ṭul a tih chuan a tidanglam/titawi thei ang.