Home Minister-in ICCC a tlawh

Aizawl Smart City Ltd. hnuaia Old Secretariat-a din, information technology hmanga Aizawl khawpui hmun hrang hrang vilna Integrated Command & Control Centre (ICCC) chu nimin khan minister K Sapdanga'n a tlawh. Aizawl khawpui hmun 76-ah surveillance camera bun a ni a, chu'ngah chuan fixed camera 236 leh pan tilt zoom (PTZ) 39 a awm.

K Sapdanga chuan, Aizawl khawpui mipui him nan leh tunlai thiamna hmanga engtik lai pawha lirthei leh Aizawl khawpui hmun hrang hrang vil theihna ICCC chu a ṭangkai hlea a hriat thu a sawi a, "Tun hnaia misual hnu chhuinaah leh lirthei intihpalhna leh lirtheiin mihring a sut a, a tlansante chu ICCC-a camera aṭangin hriat chhuah an ni," a ti.

Urban Development & Poverty Alleviation Minister chuan, chhiatrupna a thlen chánga Aizawl khawpuia hriat tur ṭulte inhrilh zung zung theihna atan ICCC chu hman ṭangkai leh zual a ṭul thu a sawi bawk.

Sorkar thuchhuah tarlan danin, ICCC bun nan leh kum nga chhung enkawl zui nan cheng vbc. 101 vel ruahman a ni. Bharat Heavy Electricals Limited (BHEL) hnenah ICCC bun hna pek niin, anni hian Agreus Infotech an thawhtir a; April 1, 2023 khan Union Home minister Amit Shah-a'n hawngin, July 2023 aṭangin hman a ni.

INTEGRATED COMMAND & CONTROL CENTRE

▶ Control room, conference room, reception area, operator room leh data centre changkang leh changtlung tak a awm.

▶ Aizawla hmun 76-ah surveillance camera bun a ni a, fixed camera 236 leh pan tilt zoom (PTZ) 39-te a awm.

▶ Aizawl kawtchhuah pawimawh hmun 14-ah automatic number plate recognition camera dah a ni.

▶ Khawpui hmun pawimawh pangaah facial recognition system dah a ni.

▶ Aizawl khawpui hmun paliah environmental sensor dah a ni.

▶ Bawlhhlawh paih motor 140-te en zui (monitor)-na tur GPS hmang Solid Waste Management Application Dashboard siam a ni.

▶ Aizawl chhung chanchin hriat zung zung theihna Variable Messaging Display hmun pali-ah dah a ni.

▶ Mipui tana a thlawna hman turin hmun 15-ah wifi dah a ni.