In kânga thite sorkarin ràlna a hlan

June 23, 2024 zana Lawngtlai Vengpuia in kânga thite leh in chhiate hnenah Lawngtlai bawrhsap Cheemala Siva Gopal Reddy chuan nimin khan sorkar aṭanga râlna (ex gratia) leh Chief Minister's Relief Fund aṭanga chhawmdawlna a hlan.

In kânga thi mi pahnih - A Sungṭiali (76) w/o H Thangnawna (L) leh H Darhliangi (70), H Thangnawna (L) farnute râl nan an chhungte hnenah DMR department hnuaia State Disaster Response Fund (SDRF) aṭanga ràlna Rs 4,00,000 ve ve chu Lawngtlai DC-in a hlan a ni. In chhia chhawmdawlna atan CM's Relief Fund aṭangin Rs 25,000 ve ve bakah, H Thangnawna (L) in leh Lalruatsanga in chhia zangnadawmna atan SDRF aṭangin Rs 1,30,000 ve ve a hlan bawk.

Lawngtlai Bawrhsap chuan, chhiatna thleng chu pawi a tih thu leh chhiat tâwkte a tawrhpui tak zet thu a sawi a; sorkarin zangnadawmna hlan tur rang taka a tifel chu lawmawma tih thu sawiin, "Chhiatna thlengah sorkar leh district administration chuan theihtawpin a chhawmdawl zel dawn a ni," a ti.