ZPM candidate-te vote turin mipui ngen
ZPM Gen.Hqrs-a Political Affairs Committee member TBC Lalvenchhunga, MLA chuan, district council-te state sorkarin a duat nia sawiin, Lai Autonomous District Council (LADC)-a VC inthlanpui leh MDC by-election awm turah ZPM candidate-te vote turin mipui a ngen.
TBC Lalvenchhunga hian nimin khan Lawngtlaiah thuthar thehdarhtute a kâwm a; Mizoramah ZPM-in sorkarna thla ruk chuang a siam tawh tih sawiin, "Sorkar hmasa lamah ADC-te'n hmasawnna hna thawhna tur chu sawi loh, an inrêlbàwlna tur leh hlawh pawh daih mumal loin an pe ṭhin. ZPM sorkar hnu hian an hlawh tur piah lamah hmasawnna hna thawhna tur cheng vaibelchhe tam tak kan pe tel a, ZPM sorkarin ADC-te a ngaihtuahzia a tichiang hle," a ti.
State sorkarin ADC-te hnena sum a pekte hi BJP hlauh vang angin Siaha lamah thu thehdarh a nih thu sawiin Lalvenchhunga chuan, "BJP hlauh vanga sum pe kan ni lo a, ZPM sorkarin ADC mipui a ngaih pawimawh vang a ni," a ti a; thu thehdarh dan chu pawi an tih thu a sawi.
TBC Lalvenchhunga sawi danin, ZPM sorkar hnuah ADC-te tan sorkarin cheng vbc. 612.17 a pe a, sorkar hmasain vbc. 505.76 an pe. Sum chu salary leh non-salary thliar hrang tawh loin duh anga hman theih turin general-ah dah a ni. LADC bikah financial year 2023-24-ah budget pangngai bakah cheng vbc. 7 pek belh a ni a, kum kal mekah indaih lohna phuhrûkna turin budget-ah sum dah a ni bawk.
LADC-a MDC by-election leh VC inthlanpui awm turah engtik lai maha inngeih ngai lo MNF leh Congress-te an ṭang dun tih sawiin TBC-a chuan, "Eng dang vang ni loin, thuneihna duh vang ngawr ngawr tih a chiang," a ti.
TBC Lalvenchhunga chuan, LADC-a MNF leh Congress party-te'n sorkar inṭâwm an siam chuan rei a daih dawn lo nia sawiin, "MNF MDC 12 leh Congress MDC pakhatte'n sorkarna an siam mek. Tun ṭum MDC by-election-ah hian Congress candidate awm loin MNF zawkin seat an chang a, MNF hi chak ta se, Congress tel loin sorkarna an siam thei dawn tihna a ni a, chuvang chuan, MDC-a MNF sorkar theihna tura MNF ṭanpui hi Congress mipui hian an ba lo a ni," a ti a; ZPM candidate vote pui turin Congress party mite a sáwm a ni.