Ramhmul damdawi chungchangah Buyers-Sellers Meet buatsaih

Nimin khan Aijal Club-ah ‘State Level Buyers-Sellers Meet for Medicinal and Aromatic Plants’ huaihawt a ni a, Health & Family Welfare minister Lalrinpuii'n a hawng. Minister chuan, kut hnathawktute chu an thawh chhuah aṭang ngeia hausak tum turin a chah.

Buyers-Sellers Meet hi sorkar laipuia Ministry of AYUSH hnuaia National Medicinal Plants Board (NMPB) kaltlangin State Medicinal Plants Board (SMPB) leh Directorate of AYUSH-te'n Forward and Backward Linkage Supply Chain of Medicinal Plants - Under Integrated Component Project hnuaia an buatsaih a ni.

Meet-ah hian ramhmul damdawi leh aromatic plant aṭanga thil siam hrang hrangte pho chhuah a ni a; Ministry of AYUSH leh CSIR-NEIST mithiamte'n thil pawimawh an zirtir bakah, kut hnathawktu (seller)-te leh a hlawma an thil thar chhuah lei tur zawngtu (buyer)-te an inkâwm bawk.

Lalrinpuii chuan, ramhmul damdawi chu hnam ro hlu leh ṭangkai a nih thu a sawi a, "Buyer-Sellers Meet hian Mizorama ramhmul damdawi chíngtute leh chíng ve duhte tan hralhna ṭha tak a hawn ka beisei. Kut hnathawktute chàwikàn hi sorkarin a ngai pawimawh a, kut hnathawktute hi kan thawh chhuah aṭang ngeiin hausak i tum ang u," a ti.

Health Minister chuan, ramhmul damdawi hralhna ṭha leh innghahna tlak a awm zel theih nan theihtawp chhuah turin AYUSH lama thawktute leh stakeholderte a chah a ni.