Birth certificate lem siamtu Lunglei District Jail-ah dah

Lunglei Police-te chuan June 22, 2024 khan birth certificate lem siam ṭhintu Kishor Kumar Chakma (29) s/o Suresh Chandra, Marpara South an man a, nimin khan Lunglei District Jail-ah dah luh a ni.

Lunglei District Research Officer (DRO) hnen aṭanga FIR an dawn bawhzuiin Lunglei police-te chuan June 22, 2024 khan Kishor Kumar Chakma chu Marpara South-ah an man a, Lungleiah hruaiin, thu an zawhfiah hnuah court thu angin nimin khan Lunglei District Jail-ah dah luh a ni.

Police-te chuan Kishor Kumar Chakma hnen aṭangin computer CPU, inkjet color printer, scanner, smartphone (IQOO) leh Rs 77,000 an man tel.

Lunglei DRO-in FIR a thehluha a tarlan danin, Kishor Kumar Chakma hian common service centre a nei a, dan kalhin birth certificate lem siamin a hralh ṭhin tih an finfiah. Birth certificate pakhat hi Rs 3,500-in a hralh ṭhin a ni.