VC dan thar duan mek sawiho

Local Administration department (LAD) minister C Lalsawivunga kaihhruaiin nimin khan Secretariat conference hall-ah The Mizoram (Village Councils) Bill, 2024 chungchang sawiho a ni.

Ṭhutkhawmah hian LAD Secretary, political party - BJP, Congress leh MNF aiawh te, MUP, Central YMA leh All Mizoram VC Association aiawh te, khawtlang inrêlbawlna lama mithiam te, The Mizoram (Village Councils) Bill, 2024 Drafting Committee member-te leh sorkar hotu dangte an tel.

Tarlan danin, VC-te chu The Lushai Hills District (Village Councils) Act, 1953 hnuaia enkawl mek an ni a, dan hi a hlui tawh avang leh khawtlangin a mamawh tawh loh a tam bakah, belh tur leh tihdanglam tur a tam avangin VC Draft Bill 2024 duan a ni.

Nimina ṭhutkhawmah hian VC member-te tam zawng chu in awm zat (household base) ni loin, mihring awm zat (population base) a kalpui tawh te, VC secretary tur chu sorkar hnathawk angin special recruitment awm turtein an rawt a; VC ṭhiah hun, ṭhiah dan leh an hnathawh tur bakah, an thuneihnate pawh sawiho a ni.

Kalkhawmte'n ngaihdan leh duh dan an neihte sawi vek sèn a nih loh avangin LAD Secretary hnenah an ngaihdante ziaka thlen a, Drafting Committee-in a khaikhawm turin an dah a; thla khat hnuah ṭhutkhawm leh ni se, an ti.

The Mizoram (Village Councils) Bill, 2024 hi Legislative Assembly-ah pawm a nih chuan khawpui sorkar (municipality), Lai, Mara, leh Chakma autonomous district council-te tel loin Mizoram pumah hman tur a ni.