Minister-in mamawhte Central-ah a thlen

Minister Dr Vanlalthlana chuan June 20, 2024 aṭanga nimin thleng khan New Delhi-ah sorkar laipuia minister-te leh ministry hrang hranga hotute a hmu a, a enkawl department mamawhte a thlen.

Dr Vanlalthlana hian sorkar laipuia Education minister Dharmendra Pradhan, Information & Broadcasting minister Ashwini Vaishnaw leh secretary Sanjay Jaju, Electronics & Information Technology secretary S Krishnan, Education & Literacy secretary Sanjay Kumar leh Higher Education secretary K Sanjay Murthy-te a dàwr a ni.

Minister Dharmendra Pradhan a hmuhnaah Dr Vanlalthlana chuan Mizorama zirnain hma a sawn theihna tura Mizoram sorkar hmachhawpte a sawipui a; Samagra Shiksha leh RUSA scheme hnuaia sum dawn hmabak awmte a hma thei ang bera pe chhuak turin a ngen.

Dr Vanlalthlana chuan, National Institute of Technology (NIT), Mizoram campus, Lengpui a hlawhtlin thuai theih nan leh Mizoram Engineering College dina zirna kalpui a nih vat theih nan hma la turin Union Minister a ngen a; NIT leh Engineering College-ah PMJVK project chak zawka kalpui a nih theih dan tur a sawipui bawk.

IB leh Electronics & Information Technology changtu minister Ashwini Vaishnaw nen an inkawmnaah Dr Vanlalthlana chuan, Mizoram sorkara IPR leh ICT department-a hmachhawpte a hrilh a; Mizoram University-a Software Technology Park din tura hmalaknate leh Digital India scheme hnuaia hmalak theihte a sawi.