KHAWTHLIR
CYMA-in lawmpui
Central YMA chuan thuchhuah siamin, Mizoram University-in under graduate result tluang taka a tichhuak chu lawmawm an tih thu leh zirlai hlawhtling zawng zawng an lawmpui thu an tarlang. Zirlai hlawhtlingte chu an kal zelna turah ram leh hnam rilru pu chunga kal turin duhsakna an hlân a; la hlawhtling rih lote chu hnual loa theihtawp chhuah zel turin an chah bawk.
Minister-in hmanpui
Minister of state Prof. Lalnilawma chuan nimin khan a bial chhunga Saitual Higher Secondary School zirlai lut tharte lawmna leh HSSLC 2024 pass tharte lawmpuina hun a hmanpui. Sikul hotute'n mamawh an lo thlen - teaching staff leh non-teaching staff indaih lohna te, subject dah belh leh school campus tihchangtlun chungchangahte theihtawp chhuahpui a tum thu Minister chuan a sawi.
Minister hoin AYUSH sawiho
Mizoram State Ayush Society (MSAS) Governing Body chu nimin khan an chairman Lalrinpuii, Health minister hoin an ṭhukhawm a, AYUSH doctor-te mamawh leh hmasawn zelna turte sawiho a ni. Mizoram sorkar hnuaiah AYUSH doctor a ngheta thawk 16, National AYUSH Mission hnuaia contract-a thawk 46, NHM leh health programme dang hnuaia thawk mi 84 vel an awm mek thu tarlan a ni.
LADC campaign theih hun a tawp
June 27, naktuka Lai Autonomous District Council (LADC)-a Lawngtlai Chandmary biala Member of District Council (MDC) by-election leh village council general election neih tura campaign theih hun chu nimin tlai dar 5 khan a tàwp. MDC by-election-ah hian ZPM, BJP leh MNF-Congress (ṭang dun)-te'n candidate an nei a; naktuk zing dar 7 aṭanga tlai dar 5 inkarah vote thlak a ni ang.
Election training
June 27, 2024-a LADC-a Lawngtlai Chandmary biala MDC by-election neih tura inthlan buaipuitu tur presiding officer leh polling officer-te tan nimin khan Lawngtlai DC conference hall-ah training thawh hnihna buatsaih a ni. Lehkha pawimawh hrang hrang leh EVM hman dante zirtir an nih bakah, sawihona leh zawhna leh chhanna hun hman a ni.