Sorkar pisaah Mizo kutchhuak hmang uar zel tura hmalak a ni - Cooperation Minister

Mizoram Apex Handloom & Handicraft Cooperative Society Ltd. (MAHCO) chuan nimin khan IPR Auditorium-ah Annual General Assembly vawi 45-na an hmang a, khuallian Cooperation minister PC Vanlalruata chuan, sorkar pisaah Mizo kutchhuak bungrua leh hnam ziarâng pho chhuak thei hmang uar tura hmalak a nih thu a sawi.

Cooperation Minister chuan, handloom chu Mizorama industry pawimawh leh thawh hlâwk ber pawl a nih thu a sawi a, "Chak zawka hmasawnna kalpui a nih theih nan handloom leh a kaihhnawih society a tam thei ang ber MAHCO hnuaiah ziah luh zel a pawimawh. Mahni ram siam chhuah ngaihsan leh ngaihhlut a pawimawh a, sorkar pisa hrang hrangah Mizo kutchhuak bungrua leh hnam ziaráng pho chhuak thei hmang uar zel tura hmalak a ni," a ti.

PC Vanlalruata chuan, sorkarin Hand Holding Policy kalpui a tum tih sawiin, MAHCO member-te chu mi dangte khaichhuak leh kaihruaitu nih tum ṭheuh turin a chah a ni.

Cooperative Societies registrar R Lalremsanga pawhin thu sawiin, puantah leh thiamhnang khawih chu eizawnna rintlak a nih bakah, hnam dangte laka Mizo hnam ziarâng phochhuahna hmanraw ṭangkai a nih thu a sawi.

MAHCO inkhawmpui hi an chairman Lalrinkima'n a kaihruai a; Mizo kutchhuak puantah leh thiamhnáng hmanga thil siamte pho chhuahna tur hmunhma ruahman belh dan tur te, Hualngohmuna Mizoram Handloom & Handicraft Complex din a nih theih nana hmalak dan turte an an rel a ni.