AMC leh LC by-election neih a ni

Aizawl Municipal Corporation (AMC) Ward-XIX by-election leh Sakhawrtuichhun Local Council by-election chu nimin khan tluang taka neih a ni a; AMC by-election-ah vote 55.04% leh Sakawrtuichhun LC by-election-ah vote 50.63% a tla.

Sorkar thuchhuah tarlan danin, AMC by-election-ah hian voter 13,344 awmin, mipa 6,233 leh hmeichhia 7,111 an ni a, vote 7,345 (mipa 3,391, leh hmeichhia 3,954) a tla a ni. Sakawrtuichhun LC inthlanah voter 1,665 zinga mi 842-in vote an thlak bawk.

AMC by-election-a vote tlate chu naktuk June 27 hian chhiar a ni dawn a, Sakawrtuichhun LC seat khat hnawhkhahna tura by-election-a vote tlate chu nizan khan chhiar a ni.

AMC Ward-XIX hian Kulikawn, Tlangnuam, Tlangnuam Vengthar, Saikhamakawn, Melthum leh Hlimen-te a huam a, hmeichhe ward a ni mek. By-election-ah hian candidate pali - ZPM, MNF, Congress leh BJP party candidate-te an awm a ni.