Hlimen khawtlang in sak an luah tawh: 'Senso kan tum vek dawn' - DMR Minister

Hlimen khawtlangin an veng chhunga leimin hlauhawmna hmuna chêng, thuneitute'n an in chhuahsan tura an tihte chenna tura in (relief camp) sak chu chhungkaw pariatin an luah tawh. Disaster Management & Rehabilitation (DMR) minister K Sapdanga chuan, relief camp sakna senso chu sorkarin a tum vek dawn thu a sawi.

Hlimen khawtlang hruaitute hnen aṭanga Vanglaini thu dawn danin, relief camp an sak zawh tawh chu chhungkaw 10 chèn theihna tura ruahman a ni a; June 24, Thawhṭanni khan an sa zo a, luah tura an thlan hmasak chhungkaw pariatin an luah tawh. In luah hmasa turte chu uluk taka thlan a ni.

Relief camp sakna atana hmanraw ṭulte chu a bá veka an lak thu sawiin Hlimen khawtlang hruaitute chuan, "Sorkar aṭanga pawisa kan hmuh hunah kan rûl ang. Vawiin (June 25) hian pawisa ṭhenkhat chu sorkar aṭangin kan dawng ang a, chu chuan kan báte kan rûl nghal phawt ang," an ti.

Hlimen khawtlang hruaitute chuan, DMR Minister-in in dang pawh sak chhunzawm tura thuràwn a pek thu sawiin, "Sorkarin kan sensote tum vek a tum. Tuna kan sakna chhak leh thlangah hian a la sak leh theih a, kan sa leh ang," an ti a, in sakna tur bungruate chu a báa an lak leh phawt dawn thu an sawi.

Nimin khan Hlimen khawtlang hruaitute chuan Aizawl DC office aṭangin in sakna senso rulhna tur sum eng emaw zat an la chhuak a, an la lak kim lohte chu sorkarin ṭum dangah a pe leh dawn a ni.

Aizawl DC-in Hlimen Venga cheng, an chenna hmun a him loh avanga hmun him lama insaseng tura a tihte hi chhungkaw 44 an ni.