Chhimtuipui luiah hydro power project din turin DPR siam mek

Sorkar laipuia Power secretary Pankaj Agarwal chuan, kawlphetha megawatt 2,400 siam chhuahna tur Chhimtuipuiah hydro power project din turin detailed project report (DPR) siam mek a nih thu a sawi.

Lok Sabha MP Richard Vanlal-hmangaiha chuan nimin khan chief minister Lalduhoma'n June 23, 2024-a Union Power minister Manohar Lal Khattar a kawmna bawhzuiin New Delhi-ah Ministry of Power secretary Pankaj Agarwal a kâwm a ni.

Sorkar thuchhuah tarlan danin, Union Power Secretary hian NEEPCO-in Mizoram sorkar hnena shortfall power bill cheng vbc 102.07 a ṭhìnna chu ngaihnathiam dan emaw, instal­ment-a pek dan emaw a awm em tih a lo zir chian tur thu Mizoram MP a lo hrilh a; Revamped Distribution Sector Scheme (RDSS) bill táng cheng vbc. 42 chu June 30, 2024 hmaa tifel turin official-te a hriattir nghal.

Power secretary Pankaj Agarwal chuan Chhimtuipui Darzokaia hydro power project, kawlphetha megawatt 2,400 siam chhuahna tur detailed project report (DPR) an siam mek thu leh, DPR siamtu WAPCOS Ltd-te'n July 2024 chhunga an zawh hman a beisei thu a sawi.

Mizoram Lok Sabha MP hi secretary to chief minister Vanlaldina Fanai leh OSD to CM Jonathan Lalrem­ruata ten an ṭawiawm a ni.