Union Rural Development minister Narendra Singh Tomar hoin nimin khan state hrang hranga Rural Development minister-te chuan video conferencing kaltlangin Awas Diwas an hmang a; Mizoram RD minister Lalruatkima pawh telin, Pradhan Mantri Awas Yojana - Grameen (PMAY-G) hnuaia Mizoram hmalaknate a sawi.

RD Minister chuan, PMAY-G hnuaia chhungkaw 26,594-te chu permanent wait list (PWL)-ah an awm thu sawiin, "Chhungkaw 9,587-te chu remanded an ni a, 3,411 chu an dilna hnâwl a ni. Scheme dawng theite chu chhungkua 13,596 an ni," a ti a; chhungkua 10,349 ziah luh an nih tawh thu te, chhungkua 7,239 hnenah ṭanpuina pek a ni tawh a, pek tur 6,357 an la awm thute a sawi.

Lalruatkima chuan, "RD Ministry-in an ruahman hun chhung ngeia PWL-te sanction tifel turin department-in a bawhzui mek a ni," a ti a; target bituk aṭangin chenna in 3,829 sak zawh a nih thu te, in 9,767 chu sak mek a nih thu leh, dilna hnâwl tawhte endik leh hna re-verification-te pawh thawh leh mek a nih thute a sawi bawk.

Minister Lalruatkima hi RD secretary Lalhmingthanga leh department officer-te'n an ṭawiawm a ni.

Share this Post