Panama Papers-ah Meghalaya sumdawng hming lang

Meghalaya Income Tax official-in a tarlan dan chuan, tun hnaia Panama Papers darhchiamah khan Meghalay-a hmunpui nei sumdawng hming pathum a lang tel niin a sawi.

Khawvela law firm lian zingah mi, Panama rama Mossack Fonseca firm-a tax document tam tham chu tunhnaiah a darh chiam a, hetah hian an firm dawrtu, mahni rama chhiah pek tur awlruk duh vanga ram pawn lam bank-a sum chheprelhtu mi tam tak hming an lang a ni.

Panama Papers-a hming lang zingah hian Philip Pala leh a unaupa, Shillong MP Vincent H Palate pawh an tel nia tarlan a ni a, anni bakah hian Lesley Shylla-a cheng Rohit Jain a tel bawk niin Income Tax official chuan a tarlang. Heng mite hi tuipui ral company Azure Enterprises Global Inc leh Eternal Enterprises Inc te nena inzawmna nei nia tarlan a ni a, heng company te hian British Virgin Island leh Cyprus-ah hmunpui an nei nia hriat a ni. Income Tax official chuan ngun tak zirchian a ni tawh a, Panama Papers-a hming langte hi hriat chhuah an ni tawh, income tax diklo tak leh PAN number lem an hmang niin a sawi.

Anni bakah hian Inter-national Consortium of Investigative Journalists (ICIJ) chuan Earce Clifford Kharsyntiew, Bokstar Kur-kalang, Karishma Jain, Karan Jain, Reshmi Rohit Jain leh Kenneth Fletcher Rangad te chu Panama Papers-ah hian an hming a chuang ve bawk niin a tralang. Sumdawng pali Kharsyntiew, Shylla, Kurkalang leh Pala te chet dan chu dan kalh a nih thu counsel S.P.Sharma chuan a sawi a, India ram pawna sum invest chu dan kalh a ni, a ti.