Dan loa khaw din

Mizoram sorkara Local Admi-nistrative Department (LAD) chhinchhiah danin, MADC leh LADC tih loh district dang parukah sorkar phalna nei loa khaw din khaw 51 a awm mek.

Dan loa khaw din hi ṭhenkhat chu sorkar project lian tham eng emaw a awm vanga chumia hnathawktute leh an mi chhawrte awm khawmna, a hnua khua anga an awm zuinate a ni a; khaw ṭhenkhat hi chu kawngpui kama awm, thingpui dawr leh chaw eina hmun sumdawnna hmun remchangte an ni. Khaw ṭhenkhat chu zu leh thil ṭha lo dang zawrh rukna tura din emaw tih mai turte a ni a, enkawltu leh khuah-khirhtu nei lo an ni.

Dan loa khaw din hi mi an awm ngheh tawh chuan hnawhchhuah mai theih an ni tawh lo a, kum tam an awm hnua thlanmualte neia an inkulh tawh chuan an chhungte thi ta avang pawhin pem an harsat tawh ṭhin. Enkawltu leh kaihruaitu nei loin khua a lo ding a, hengte hi sorkarin a hunlaia a ngaimawh loh chuan, a hnuah harsatna thlentuah an ṭang let thei.

Hetihlai hian dan loa khaw dinah hi chuan politician-te hi an demawm ṭhin a, an khaw din dan kalphung a dik leh dik loh lam ngaihtuah tawh loin, 'Voter engzat nge awm?' ti zawngin an thlir tawh a, hei hian harsatna tam tak a lo thlen tawh ṭhin.

Sorkar hian dan loa khaw dinte hi ngun zawkin vil zui se, khaw ṭhenkhat hi chu an khawsak danah leh an inen-kawlnaah pawh khaw pangngaia hlankaia inrelbawlna ṭha zawk neih phu an awm a; khaw ṭhen-khat erawh chu sorkar phal loh thil tihrukna hmunpuite a nih avangin a rang thei ang bera
ṭhiah chi an ni ang.

Dan kengkawhtu tur sorkar kan nei a, chuti chunga dan loa khaw din an pung zel a nih chuan sorkar mualphona a ni e.