Vanglaini - Zirlaite zirna hmanrua vailiam

KHAWTHLIR

Hnam dang truck phalsak rih lo

Champhai Import-Export Transport Forum (CEITU), Mizoram Export-Import Union, Importer Exporter Syndicate, MTOA leh MTDA-te November 19, 2020-a ṭhukhawm chuan, Covid-19 hripui laka mipui an him zawk nan hnam dang truck-te'n kumin chhung chuan Champhai aṭangin bungrua phur chhuak ve tawh rih lo se, an ti.

Inhlawhna siamsak

Aizawl North-II MLA Dr Vanlalthlana chuan Covid-19 lockdown avanga a bial chhunga khawsak harsa zawkte tan inhlawhna a siamsak. Covid-19 léng vanga sorkarin inkhàrkhip a kalpui a ngai a, mi tam takin hna thawk thei loin harsatna an tawh avangin, MLA hian a biala chhungkaw 200 chuang tan inhlawhna a siamsak a; thlànmual leh veng chhung hmun ṭhenkhat tihfai a ni.

SRH-ah mi 45 awm

State Referral Hospital-ah nimin khan Covid-19 vei mi pakhat dah luh a ni a, ani nen mi 45 an awm mek a, an zingah kum 60 chung lam mi 16 an tel. SRH-ZMC Bulletin tarlan danin, mi 45 zinga pathum chu ICU-ah enkawl an ni a, mi dang zawng chu Isolation ward-ah an awm a ni.

Journalist thi rál

Chanchinbumi July 14, 2020-a thi Francis Paul (Gerrard-a Pa) chhungte hnenah Mizoram sorkarin a ràlna Rs. 1,00,000 chu nimin khan IPR director Lallianpuii'n Mizoram Journalist Welfare Society kaltlangin a hlàn. Ràlna inhlanna hi IPR Director pisaah neih a ni a, MJA hruaitute an tel. Francis Paul hi Doordarshan Kendra, Aizawla sports magazine buatsaihtu ṭhin a ni a, MJA member a ni.

Complaint tum

ZPM chuan, January 16, 2020-a Tripura leh Mizoram sorkarin Ministry of Home Affairs kaihhruainaa inremna an siam tawh hnu pawha Tripura-a khawsa zui ta Bru-te Mizoram Electoral Roll aṭanga tun thlenga paih an la nih loh avangin Election Commission of India-ah complaint thehluh an tum thu an tarlang. ZPM hian ECI-a zualkona hi Mizoram Chief Electoral Officer kaltlangin November 23, 2020-ah thehluh an tum a ni.

DAWNTISEI

Zirlaite zirna hmanrua vailiam

Mamit bialtu MLA H Lalzirliana chuan nimin khan Hero Motocorp-in CSR fund aṭanga an pek first responder vehicle (FRV) leh zirlai naupangte hman tur zirna hmanraw hrang hrang a vailiam.

Mamit district hian zirna tihhmasawn nan CSR fund aṭangin cheng nuai 879 an dawng tawh a, zirna hmanraw hrang hrang cheng nuai 17.39 hman tawh a ni. Mamit district-a sikul 170 tan ṭhutthleng leh dawhkan 843 leisak a ni a, chuta senso chu cheng nuai 29.505 a ni. Green board 503 lei nan cheng nuai 25.15 hman a ni bawk.

Share this Post

Login to comment

No Comments