Muslim-ten Ramadan hmang ṭan

Khawvel pumah Muslim-te chuan nimin aṭang khan an thla thianghlim, Ramadan thla an hmang ṭan. He thla serh an hman chhung hian zing ni chhuak aṭanga a tlak thlengin chaw an nghei a, midangte tana thil ṭha tihna atan an hmang ṭhin.

Ramadan hi khawvel puma Muslim, tluklehdingawn 1.2 vel awmte chuan ṭawngṭaina nen hmangin, nimin aṭang khan chaw an nghei ṭan a ni.

Muslim-te chuan Ramadan hi kum 1,400 chuang liamtaa an zawlnei, Prophet Muhammed-a hnenah an lehkha bu thianghlim, Quran-a chang bul hriatir a nih
ṭanna thla niin an ngai. He thla serh an hman chhung hian mosque-ah tlai lam ṭawngṭai, 'taraweeh' hun an hmang ṭhin a, an hun awlah Quran chhiarin, an sakhaw zirtirna thute an ngaithla ṭhin.

Ramadan thla hman chhung hian Muslim-te chuan zing ni chhuak aṭanga ni tlak inkarah engmah an nei lo a, zu, meizial leh mipaat hmeichhiat thilah pawh an insum vek ṭhin a ni. Hetihlai hian naupang, tar leh damlo bakah hmeichhe naupai laite erawh chu ngaihnathiamna a awm thung.

Ramadan laia chaw nghei chu Islam zirtirna-in ti tura a phut pawimawh panga zingah a tel, a dangte chu - Muslim zirtirna an pawm thu puandarh te, nitin
ṭawngṭai te, midang ṭanpui leh Mecca-a biakzina kalte a ni.

Muslim ram tam takah chuan he thla serh hman chhung atan hian office hnathawh hunte tihtlem a ni a, restaurant tam zawk chu chhunah khar an ni bawk.