Puerto Rico-ah Hillary a chak

US President thlanna neih tura Democratic party candidate inchuha Puerto Rico primary election neihah hma hruai mektu, Hillary Clinton a chak. Clinton-i hi party candidate ni thei turin a dinhmun a ṭha tawh hle.

US Secretary of State hlui, Clinton-i hian Pathianni-a inthlan neihah hian vote 62.5% a hmu a, a khing≠pui Senator Bernie San≠ders chuan 37.1% a hmu. Inrinni-a US Virgin Islands-a vote thlakah pawh Clinton hi a lo chak tawh bawk. Vawiin hian New Jersey leh California-ah primary election hi neih leh a ni ang.

November thlaa US President thlan huna Democratic party candidat ni tur hian delegate 2,383 neih phak a ngai a, Puerto Rico inthlan neih hma hian Clinton-i hian delegate 2,323 a nei pha tawh a ni. Hetihlai hian Bernie Sanders chuan Republican candidate Donald Trump khing tur chuan Clinton-i aiin a ṭha zawk nia sawiin, July thlaa Democratic National Convention neih hma chuan theihtawp chhuah zel a tum tih a sawi. Convention-ah hian an party candidate tur hi official-in puan a ni dawn a ni.