PM Modi-an Switzerland a thleng

Ram panga tlawh tura zinchhuak Prime Minister Narendra Modi chuan nimin khan Switzerland a thleng.

PM Modi chuan nimin vek khan Geneva-ah Swiss President Johann Schneider-Amman chu kawmin, ram pahnihte inlaichinna leh thawhdunna ṭha zawk siam dan turte an sawidun a ni. Ram hrang hrang tlawh tura a zinchhuah hmain PM hian Switzerland chu Europe khawmuala India ram thawhpui ram pawimawh tak a nih thu a lo sawilang tawh a ni.

Modi chuan Swiss bank hrang hranga India mi ṭhenkhatten chhiah awlruk duh vanga sum an chheprelh chungchangte a sawichhuah ngei rin a ni. PM chuan Nuclear Suppliers Group (NSG) member ni tura India-in a beih mekna thlawp turin Swiss President chu a ngen a, President Johann Schneider-Amman chuan theih≠tawp an chhuahpui tur thu a sawi. India hian Nuclear Non-Proliferation Treaty a ziah ve duh loh avangin NSG member hi kum rei tak a ni thei tawh lo a ni.

Prime Minister hian nimin vek khan Switzerland aṭang hian US a pan leh nghal a, US President Barack nen kum hnih chhung a ṭum sarihna atan an inhmu leh dawn a ni. Modi hian PM a nih hnua US a tlawh ṭum li-na tur a ni bawk. US aṭang hian Mexico a pan leh ang a, Mexico aṭang hian India ramah a rawn kir tawh dawn a ni.