Discharge protocol siam fuh lo vangin Covid-19 a darh nasat phah - MPCC


Mizoram Pradesh Congress Committee (MPCC) Media department chuan, Mizoram sorkarin Covid-19 veite chhuahtirna atana kaihhruaina - discharge protocol a siam fuh loh avangin hripui a darh nasa tih an sawi a; Covid-19 donaa hlawhchhamah sorkar an puh.

MPCC Media hotute'n nimin khan Aizawl Press Club-ah thuthar thehdarhtute an kâwm a; an chairman Dr Lallianchhunga chuan, Health department-in September 25, 2020-ah discharged protocol an tihchhuah thu sawiin, "Covid-19 hri kái, natna lang chhuak leh lang chhuak lote chu hmuh chhuah a nih aṭanga ni 10-naa Rapid Antigen Test (RAT)-ah an negative chuan chhuahtir theih a ni ang, tih a ni," a ti.

Dr Lallianchhunga chuan, discharged protocol hman ṭan a nih aṭangin ZMC leh CCC hrang hranga enkawlte chu chhuahtir zung zung an nih thu sawiin, "Notification chhuah ní, September 25-ah phei chuan mi 183 zet chhuahtir nghal an ni," a ti a; September 25 aṭanga October 14, ni 20 chhungin mi 973 chhuahtir hman an nih thu a sawi.

MPCC Media Chairman sawi danin, Mizoram sorkarin September 25, 2020-a discharge protocol thar a tihchhuah hma, September 10-ah Ministry of Health and Family Welfare leh ICMR-te'n RAT chu a rintlak tâwk lo tih hriain, natna lang chhuak (symptomatic)-te chu RAT-ah negative mah se, RT-PCR hmanga endik nawn leh vek turin state leh union territory-te a hriattir a ni.

Sorkar laipuiin hriattirna a chhuah hnuah Mizoram chuan dis­charge protocol thar siamin, Covid-19 positive-te chu RAT hmanga enfiahnaah an negative chuan RT-PCR a endik nawn tawh loin, enkawlna hmun aṭangin a chhuahtir ṭhin.

Dr Lallianchhunga chuan, Covid-19 veite RT-PCR hmanga endik nawn loa RAT hmang chauha endik an nih avang te, RAT-a negative-te chhuahtir zel an nih avang leh, RAT chu rintlak tâwk loa ngaih a nih si avangin damdawi lama thawk tam tak an hlauthawng tih a sawi a, "Dam anga chhuahtir mi tam tak, la dam chiang si lote'n an kài darh vak thei tih hriain ṭhenkhat phei chu an au chhuak hial a ni," a ti.

September 25-a dis­charged protocol thar tihchhuah aṭanga ni 26-na, October 20 aṭangin Mizoramah Covid-19 vei an pung zawt zawt nia sawiin Lallianchhunga chuan, "October 20 aṭanga November 19, ni 31 chhungin Covid-19 vei hmuh chhuah mi 1,258 an awm," a ti a; ni 31 chhung hian ni tin Covid-19 vei mi 40 zel hmuh chhuah ang a nih thu a sawi.

Hripui vei an pun chak avangin Mizoram sorkar a hlauthawng ta deuh tih sawiin Maliana chuan, "October 31 khan revised discharge protocol tichhuakin, ni 10-naa RAT-a negative result nei, chhuah tirte chu 'Uluk takin an inenkawl chhunzawm ngei tur a ni' tih chu 'Chhuah an nih aṭanga ni sarih chhung uluk takin an inkhung hrang chhunzawm ngei tur a ni' tia thlak a ni," a ti.

MPCC Media Chair­man chuan, Mizoram mipuiin sorkar thu kan awih hle tih sawiin, "Lockdown vawi eng emaw zat puan a ni chungin sorkarin khuahkhirhna dan a siamte zâwm ṭha ber state kan ni hiala sawi a ni," a ti a; mipuiin thu an âwih em em laia Covid-19 a darh chak chu sorkarin a tih tur a tih tâwk loh vangah an ngaih thu a sawi.

MPCC Media tarlan dangte

•October 4, 2020-a Health Minister-in Covid-19 hri inkài chhàwnna (transmission chain) chhut chah a nih tawh thu a sawi hnuah November 20, 2020 thlengin hripui vei thar mi 1,419 an awm.

•Hmarchhak state pasarih zingah Mizoram hi Covid-19 vei thar punna sang ber kan ni mek a, ni tin 1.2%-a pung zel ang kan ni. India-ah pawh vei thar punna rate sang berte zinga mi kan ni mek. NE state dangte pun dan - Nagaland 1.1%, Manipur 0.7%, Meghalaya 0.6%, Tripura 0.2%, Arunachal Pradesh 0.2%, Assam 0.1%.

•Hmarchhak state zingah mipui awm zat aṭanga chhûta sample test chak lo ber zinga mi kan ni mek.

•Covid-19 avanga Mizorama thite chu September 25 hnu lama Covid-19 vei vek an ni.



Share this Post

Login to comment
No Comments