LADC hnuaia inthlan neih turah nomination thehluh hun a tâwp

June 27, 2024-a Lai Autonomous District Council (LADC) hnuaia village council inthlanpui neih tur leh Lawngtlai Chandmary biala MDC by-election neih tura chuh tumte tana hming pek luh hun chu nimin chawhnu dar 3 khan a tawp a, MDC by-election atan mi pathumin hming an pe lut.

Lawngtlai Chandmary biala MDC by-election neih turah hian BJP, MNF leh ZPM candidate-te'n nimin khan returning officer (Lawngtlai DC) Cheemala Siva Gopal Reddy hnenah hming an pe lut. Nomination paper-te chu vawiinah endik a ni dawn a; June 21, 2024 chawhnu dar 1 thleng inhnuhdawh hun hawn a ni ang.

Nomination thehlut­tu­te chu - BJP aṭangin K Lalawmpuia, MNF aṭang­in C Lalsawm-zuala leh ZPM aṭangin F Hrang­tukhuma te an ni a; Congress party chuan candidate an siam lo a, MNF candidate an thlâwp dawn nia thu dawn a ni.

LADC Lawngtlai Chand­mary bialtu MDC ṭhin Dr Lorrain Lalpekliana Chinzah chu kum 2023 MLA inthlanpuiah thlan tlin a nih avangin MDC a nih­na chu a bansan a, chuvang chuan by-election neih a ngai a ni.

LADC huam chhungah hian VC 99 a awm a, VC seat 595 awmin, chu'ng zinga 496 chu general seat a ni a, seat 99 chu hmeichhe tana hauh a ni.

LADC VC general election-a vote tlate chu vote thlak zawh veleh chhiar nghal tur a ni a; Lawngtlai Chandmary MDC by-election-ah chuan EVM hman tur niin, July 1, 2024-ah vote chhiar a ni ang.