Taxation dept-in thla 2 chhungin chhiah nuai 2,461 an hmu

Taxation department chuan financial year 2024-25 kal mekah April-May, 2024 chhung khan chhiah cheng nuai 2,461 an hmu a; chhiah an hmuh tamna ber Goods and Services Tax (GST) aṭangin cheng nuai 2,087 an hmu.

Taxation department-in thla tina chhiah an hmuh (monthly achievement) zat an tarlan danin, sorkar kum kal mek (2024-25)-ah April thla chhung khan chhiah Rs 1,65,01,97,183 an hmu a, May thla chhungin Rs 81,09,10,407 an hmu bawk a; thla hnih chhunga chhiah an hmuh zat chu Rs 2,46,11,07,590 a ni.

Chhiah an hmuh zingah GST aṭanga lut a tam ber a, thla hnih chhungin GST aṭangin Rs 2,08,73,56,733 hmuh a ni. Profession tax aṭangin Rs 1,21,56,110, sales tax aṭangin Rs 36,15,52,347, entertainment tax aṭangin Rs 10,000 leh thil dang aṭangin Rs 32,400 hmuh a ni bawk.

Kumin April leh May thla chhunga Taxation department-in GST aṭanga chhiah a hmuh Rs 2,08,73,56,733 hi chhiah a hmuh zawng zawng Rs 2,46,11,07,590 aṭangin 84.81% a ni.