2024-25 AMC budget cheng nuai 11,518.40

Aizawl Municipal Cor­po­ration (AMC) Board of Corporators chuan June 14, 2024 khan financial year 2024-25 chhunga AMC sum hman tura rua­hman (budget) Rs 1,15,18,40,000 an pawm.

AMC Board of Corpo­rators (BoC) chu June 13-14, 2024 khan an ṭhu­khawm a, mayor Lalrin­enga Sailo-in a kaihruai. June 13 khan executive corporator (Cash & Accounts) Lalringliana'n AMC budget estimate 2024-25 a pharh a, June 14 khan sawiho niin, kum 2024-25 chhunga AMC sum hmuh tur leh hman tura ruahman cheng nuai 11,518.40 chu pawm a ni.

Thu dawn danin, AMC budget thar cheng nuai 11,518.40 zinga Rs 11,01,68,434 (nuai 1,101.68) chu AMC thawh chhuah (own source of revenue) tur a ni a, a dang zawng chu sorkar laipui leh state sorkar aṭanga dawn tura beisei a ni thung. Kumina AMC sum thawh chhuah tura ruahman hi nikum aiin Rs 1,37,39,434-in a tam zawk.

AMC-in a thawh chhuah tur (own source of revenue) cheng nuai 1,101.68 zinga nuai 620 chu Property Tax aṭanga hmuh beisei a ni a; a bak chu CSTT, CCBT leh AMC in hrang hrang luah man, parking fee, hoarding fee leh thil dang aṭanga hmuh beisei a ni. Kum 2024-25 chhunga AMC-in 15th Finance Commission grant hmuh a beisei cheng vbc. 39 zinga vbc. 9.23 chu Lunglei Municipal Council tan dah hran a ngaih thu tarlan a ni bawk.

AMC budget estimate aṭanga 19.10% chu AMC inrêlbâwlna atan leh 80.90% chu mipui hamṭhatna atan hman tura ruahman a ni a; inrêlbâwlna atana sum hman tur zingah, budget pumpui aṭanga 11.01% chu corporator-te lawmman leh thawktute hlawh kaihhnawih atan hman tur niin, 8.09% chu local council lawmman leh office inrêlbàwlna atan dah a ni.

Bawlhhlawh lâk khawm leh sâwngbâwlna kaihhnawih atan budget pumpui aṭanga 23.34% hman a ni dawn a; tui leh a kaihhnawihah 20.80%, hmasawnna hnathawhna atan 22.10%, LC-te hnena veng chhung hmasawnna atana pek tur 5.02%, Ward Development Fund atan 6.64% dah a ni bawk.

AMC BoC meeting-ah hian AMC sum thawh chhuah a pung zawnga a kal chu lawmawm an tih thu te, Solid Waste Management Center, Tuirial atan state sorkar aṭangin cheng nuai 492.57 dawn a ni tur chu lawmawm an tih thu te, Lok Sabha inthlanpui leh chhan dang vangin budget a hun taka pharh theih a nih loh thute sawi lan a ni.

Aizawl khawpui tan ruahmanna mumal zawk a awm theih nan Aizawl Development Committee (ADC) din chungchang leh parking chungchanga local council thuneihna pek theihna dan Parking Regulations Amendment chungchang sawiho a ni.

AMC-in sum lak luhna tur (revenue generating asset) - Tuikual South-a AMC Multi-Complex, Bawngkawna AMC Plaza leh AMC Sports Complex, Zonuam leh Ailawnga AMC Ecopark a din tawh thute sawi a ni bawk.

BoC meeting-ah hian Ward-VI corporator John Zosangliana Ralte, March 21, 2024-a thi ta sunna hun hman a ni.(