YMA Day hlim taka lawm a ni

June 15, Inrinni khan YMA Day vawi 90-na Mizorama khua leh veng hrang hrang bakah, state pâwna YMA dinna hmunahte hlim taka lawm a ni a; Central YMA hruaitute leh ram hruaitute'n hmun hrang hrangah an hmanpui.

YMA Day hi branch hrang hrangin an remchan angin an lawm a, zing aṭanga zan thlengin lawm a ni. YMA branch tam tak chuan kár tìr lam aṭangin lawmna hun an hmang ṭan tawh. Branch tam tak chuan khua/veng chhung leh thlanmual tihfai hnatlang an nei a, branch eng emaw zatin intihhlimna leh infiamna hun an hmang a, zai lama intihsiakna hun atana hmang an awm bawk.

North Hlimen YMA Branch chuan YMA Day pual hian an khaw luhna leh chhuahna kawng chhe zuallai siam hnatlang an ko. Hmun thumah in ṭhenin, kawng khuar tui tlinnate an sah bakah, a khuar zual lai an hnawh. North Hlimen hi Serkhan - Bagha road-a awm an ni.

Central YMA president Lalhmachhuana chuan ITI Veng, Chungtlang leh Chaltlang Lily Veng branch-ahte a hmanpui a; hmasawnnain Mizote kawng hrang hrangin a nuai mek tih sawiin, "Ruihhlo bakah, tech­no­logy leh culture-tein min nuai. Mizo takin a changkan theih a, kan nun ze mawi leh tlawmngaihnate a bo mai loh nan ṭhalaite hian ngaihtuahna thar kan sên a ngai a ni," a ti.

YMA Day pualin chhawmdawl ngai eng emaw zat hnenah ṭanpuina sem chhuah a nih thu sawiin Lalhmachhuana chuan, "YMA bân hian thui takin mi tin a kuangkuah mek a, a kuangkuah zel dawn," a ti a; Siamṭhat hna thawhnaah hma latu an tam telh telh a ngaih thu leh ram leh hnam tan ngaihtuahna thar sên a ṭul thu a sawi.

YMA Day hi chief minister Lalduhoma'n Biate Branch-ah a hmanpui a, Home minister K Sapdanga'n Hmunpui Branch a hmanpui. Minister leh MLA dangte pawhin hmun hrang hrangah an hmanpui hlawm a ni.

YMA-ah hian branch 821 a awm a, chu'ng zinga 767 chu Mizoram chhunga mi niin, Mizoram páwnah branch 54 a awm a; Aizawl khawpui bikah branch 109 a awm.YMA member 4,90,601 awmin, mipa 286,858 leh hmeichhia 203,743 an ni a; group 50 leh sub-headquarters pariat a awm bawk.