CM-in Zofa Agency a hawng; Agency-a harsatna sawifiah

Chief minister Lalduhoma chuan nimin khan Hyve Aizawl City Hall-ah Ministry of External Affairs aṭanga phalna neia din Zofa Agency a hawng a; tun hnaia placement agency chungchanga harsatna a sawifiah nghal.

CM Lalduhoma chuan, Mizoram eco­no­my a ṭhat loh avang­in un­employment a nasat thu a sawi a, "Compe­ti­tion exam-ah kan tling hlei thei si lo a, hna hnuaihnung zawk thleng­a kan dap a ngai. Thing­tlangah hna a váng zual a, hna zawngin khaw­puiah ṭhalaite an lut a, an beisei ang an hmu vek thei lo," a ti.

Ṭhalai hna zawngte harsatna hriain ram páwnah hna an thawh theih nan Mizoram sor­karin kum 2015 khan Mizoram Private Place­ment Agencies (Regulation) Act, 2015 a siam tih sawiin Lalduhoma chuan, "Chu Act-ah chuan 'Beyond the boundaries of Mizoram' tih hmun hnihah ziah lan a ni," a ti a, chu dan hmang chuan agency 27 hnenah phalna pek a nih thu a sawi.

Chief Minister chuan, dan chu Mizoram sorkar thuneihna piah lam thil a ni tih hria an awm lo nia sawiin, "Kan han kalpui ta a, harsatna kan tâwk a, a lo langfiah ta a ni. Agency te pawhin kawng dangin dan an lo bawhchhe ve. Women Commission-in thubuai an thehlut a, nikum lamah mi 29 man an ni. Bail theih a nih avangin bail an ni a, investigation tih vek tawh a ni," a ti.

Lalduhoma chuan, hremna lamah Mizoram sorkarin prosecution sanction an ti thei lo nia sawiin, "January 2024 khan sorkar laipuiah kan dil a, vawiin thlengin chhanna kan la nghak. Kan han sorkar veleh khan heng licence-te hi kan cancel ta vek a ni," a ti a, tu mah licence nei an awm tawh loh thu a sawi.

Ram danga Mizo awmte chu hûi khawm ṭul an tih avangin Zo Diaspora Cell an din tih sawiin Lalduhoma chuan, "CM office aṭangin kan function dawn. Kan harsatnate sutkian theihna awm chhun chu sorkar laipui aṭanga dan ang thlapa licence neih a ni," a ti.

Chief Minister chuan, Zofa Agency a ding chu lawmawm a tih thu sawiin, "An tumruhna leh thawhrimna zarah kan ṭhalaite'n thlamuang takin ram páwnah hna an zawng thei dawn a ni," a ti a; ram danga hna sang leh zahawm tak takte pawh thawk thei tura inbuatsaih turin Mizo ṭhalaite a chah.

Zofa Agency hi mi parukin an din a ni a, Ministry of External Affairs aṭanga license nei turin sum leh pai an sên nasat bakah document mamawh a tam hle. Hun eng emaw chen an buaipui hnuah January 30, 2024 khan phalna an hmu a, March thlaah Protector of Emigrants-in an enfiah a, branch panga dang dil leh turin thurawn pek angin an dil mek a ni.