Aizawl tana ro tling siam aia party mite vulh ngai pawimawhah AMC sorkar puh

Aizawl Municipal Corporation (AMC)-a eptu corporator-te chuan, AMC-a sorkarna chelhtute'n property tax return sum, ward fund an pek kim ngai loh thu leh AMC-a sum awmte chu Aizawl khawpui tana ro tling siamna atana hman aiin, an party mite invulhna atana hman an ngai pawimawh zawka an hriat thu an sawi.

AMC-a opposition corporator-te chuan nimin khan Aizawl Press Club-ah thuthar thehdarhtute an kâwm a; opposition leader Malsawmzuala Ralte chuan, tuna AMC term kal laiah, kum 2021 aṭanga 2024 thlengin rorel lai MNF corporator-te'n an party mi leh sate vulh nan hna tereuhtê tê an pek tawhah Rs 30,92,32,050 an hman tawh thu a sawi a, "Aizawl khawpui tana ro tling siam aiin party mite invulh an ngai pawimawh zawk niin kan hria," a ti.

Malsawmzuala Ralte chuan, AMC property tax aṭanga sum hmuh zinga 80% chu mipui tana hman leh tur, corporator-te'n an bial hmasawnna atana inzat ṭheuha an insem tur a nih thu a sawi a, "Mahse, tun term-ah hian a inzata sem a ni ngai lo. Budget-ah property tax hmuh zat tarlan a nih laiin, a hmanna erawh tarlan a ni ngai lo," a ti a, board of corporator (BoC) hriatpui lohin thil an tih nasat thu a sawi.

AMC Opposition Leader tarlan danin, Financial year 2023-24 ah property tax-ah cheng nuai 600 hmuh a ni a, chuta ṭanga nuai 30 (5%) chu local council-te'n an chang a, nuai 90 (15%) chu AMC inrêlbâwlna atan dah a ni. Nuai 480 (80%) chu ward tina hna thawhna atan inzata sem tur a ni a, cheng nuai 15 ṭheuha sem niin, ward 19-a sem zat chu nuai 285 a ni. A bak nuai 195 chu AMC sorkarin an hmanna hriat a ni lo.

Ward-VIII corporator Christina Ro­luah­­puii Sailo sawi danin, financial year 2021-22 khan property tax return aṭangin ward/corporator tinin cheng nuai 12 ṭheuh dawng tur an nih laiin, Rs 7,00,000 an dawng a, Rs 5,00,000 an dawng lo. Kum 2022-23 ah Rs 10,00,000 ṭheuh an dawng a, dawn kim loh tam tak a awm.

Christina Roluahpuii chuan zawhna chhângin, "Ward fund min pek kim loh hi an hmanna kan hre lo. Sum min pek kim loh hi BoC-ah ka sawi chhuak tawh a, ka zawt tawh. Tuikual bazar sak nan kan hmang tihte a ni a, a chiang lo hle," a ti.

Eptu corporator-te chuan, "Ward fund kan hmang ṭha tâwk hleah kan ngai a, kan hman dan hi thlalak nen kan thehdarh ṭhin," an ti a; ward fund an hmanna leh hnathawhte an thehdarh ṭhin chu AMC sorkar hotute'n an khak ṭhin thu leh hrêkah an vau ṭhin thu an sawi.

Malsawmzuala Ralte chuan, mipuiin AMC an dawr tamna ber chu in sak, lei laih leh dawr hawn phalna license/permit dil chungchangah a nih thu sawiin, "Hengah hian hmalakna a muang ṭhin hle a, thla 5-te nghah a ngai ṭhin a, mipuiin harsatna an tawh phah nasa hle," a ti a; AMC sorkar chu mipui tana zângkhai tur ngaihtuah aia harsatna siam tum zawkah a puh.

Zawhna chhangin eptu corporator-te chuan, "BoC ṭhutkhawm hnuhnung ber dawttuah khan permit/license dilna hrang hrang ngaih­tuahtu tur committee din kan rêl a, mahse, tun thlengin order a la chhuak lo a, meeting neih a la ni lo," an ti a; AMC sorkarin BoC meeting rorel an palzût nasat thu an sawi.

Malsawmzuala Ralte chuan, AMC-in Solid Waste Management Centre, Tuiriala hman tur bawlh­hlawh hâlna, inci­nerator leina atan Mizoram sorkar aṭangin cheng nuai 274 hmuh a nih thu sawiin, "Hyderabad aṭangin khawl lei a ni a, Tuirialah bun tawh a ni. Bun a nih aṭangin mumal taka hman theih a ni lo nghal a, tunah phei chuan hman lohin an dah ringawt tawh... Khawl lei danah thil fel lo a awm ngai niin a lang," a ti.

AMC Opposition Leader sawi danin, incinerator supply-tute an zawhfiahnaah, khawl chu darkar 24 chhungin bawlhhlawh ton 10 (kg. 10,000) hâl thei tur a nih thu an sawi laiin, tunah chuan kg. 600 vel chauh a hâl thei. Khawl lei dan sawi­fiah turin AMC sorkar an phût a ni.

INC corporator Rosiam­ngheta chuan, Aizawl khawpui chu tihhmasawn a ngai tih sawiin, "AMC-ah sum tam tak a awm, mahse, khawpui tana ro tling siam aiin party induhsak nan an hmang duh zawk. Emergency response vehicle lei pawh BoC-ah kan pass tawh a, mahse, tun thlengin lei a la ni lo. Sorkar hian BoC rorel an zah lo a, democracy an palzût a ni," a ti.